Gazeta Si - Gjykata e Posaçme e Apelit për Korrupsionin dhe Krimin e Organizuar ka rrëzuar kërkesën e Ramazan Rrajës për ndryshimin e masës së sigurisë, i akuzuar si i përfshirë në atentatin ndaj ish-prokurorit të Durrësit, Arjan Ndoj.
Kjo nuk është hera e parë që Ramazan Rraja, i arrestuar në prill 2023 si pjesëmarrës në atentatin ndaj ish-prokurorit Ndoj në vitin 2019, ku mbeti i vrarë shoferi i tij, kërkon zbutje të masës së sigurimit.
Ai ka kërkuar edhe 2 herë të tjera, ku sërish GJKKO e ka rrëzuar. Përveç akuzave të mëparshme për organizimin e atentatit ndaj ish-prokurorit në vitin 2019, 30-vjeçarit i është shtuar edhe akuza e armëmbajtjes pa leje.
Rraja ishte shpallur në kërkim ndërkombëtar dhe ndaj tij kishte masë sigurie "arrest në burg" në mungesë për atentatin ndaj ish-prokurorit Arjan Ndoj, në të cilin mbeti i vrarë Andi Maloku dhe u plagosën Aleksandër Laho dhe vetë prokurori i Durrësit. Vetë Rraja, para gjykatës i ka mohuar akuzat e prokurorisë.
I shpallur në kërkim, ai u kap mbrëmjen e së mërkurës te Ura e Gjoles në Fushë-Krujë, gjatë një operacioni të koduar "Komploti".
Në momentin e arrestimit Rraja ishte me pistoletë në brez. Për këtë arsye, ndaj tij është ngritur edhe akuza e armëmbajtjes pa leje.
Ai u shpall në kërkim së bashku me disa persona të tjerë, përfshirë Plarent Dervishajn, i cili ndodhet në Dubai.
Policia tha se 30-vjeçari nuk ishte larguar në asnjë moment jashtë shtetit, por fshihej në trekëndëshin “Durrës-Lezhë-Tiranë”.
Pak muaj më parë, në banesën e Ramazan Rrajës në Fushë Krujë, janë ushtruar dy kontrolle, pasi dyshohej si person që kishte dijeni për atentatin ndaj ish prokurorit Arjan Ndoj.
SPAK-u lëshoi urdhër për shoqërim të detyrueshëm të tij për të dhënë dëshmi, por në momentin e kontrollit Rraja nuk u gjend në banesë, dhe u paraqit pak kohë më vonë. Pasi u mbajt për disa orë në policinë e Tiranës, Rraja u la i lirë.
Në muajin shkurt, 30-vjeçari u dënua me 12 vite burg nga drejtësia belge, ku akuzohej si pjesë e një grupi kriminal shqiptaro-letonez, me rrezikshmëri të lartë, që nxirrte fitime të mëdha nga kontrabanda dhe trafikimi i kokainës.
Bashkë me Rrahjan, mbrëmjen e së mërkurës u arrestua edhe miku i tij, Luis Konomi, i cili ishte shpallur në kërkim nga policia e Elbasanit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.