.png)
Pesë ekspertë shqiptarë u certifikuan sot duke u bërë pjesë e grupit që do të “skanojnë” në makinën e së vërtetës kreun dhe të anëtarët e Byrosë Kombëtare të Hetimit. Në këtë ceremoni të zhvilluar në ministrinë e Brendshme ishte prezent ambasadorja e SHBA-ve, Yuri Kim.
Makina e poligrafit do të përdoret nëse anëtarët e rinj të FBI-së shqiptare deklarojnë ose jo të vërtetën. Ekspertët e parë poligrafë janë tranuar nga SHBA. Procesi i kontrollit poligrafik do të kryhet nga Shërbimet e Çështjeve të Brendshme dhe Ankesave në Ministrinë e Brendshme. Gjatë fjalës së saj, ambasadorja Kim u shpreh se këta 5 persona janë pak, por është një nismë e madhe dhe shumë e rëndësishme për Shqipërinë. Ambasadorja e ka cilësuar si një moment të rëndësishëm për vendin.
“Shqipëria ka ligjin e ri për SPAK që kërkon që punonjësit e BKH-së t’i nënshtrohen ekzaminimit me poligraf përpara punësimit. Këta ekzaminues dhe pajijsja e dhuruar nga SHBA do sigurojnë aftësinë për tu zbatuar sipas ligjit të ri të SPAK. Ata janë një tjetër armë në arsenalin e Shqipërisë për të luftuar korrupsionin, tjetër mundësi për të zbatuar shtetin ligjor. Është një gur shumë i rëndësishëm. Përparimi i Reformës në Drejtësi është element i rëndësishëm i të ardhmes tuaj”, theksoi ambasadorja.
Pesë studentëve sipas ambasadores i është bërë 400 orë trajnim në shkencat e poligarfisë. Kanë studiuar psikologjinë, teknikat e intervistimit dhe teknikat e testit. “Instruktorja e ka vlerësuar përkushtimin e tyre dhe disiplinën e tyre në kurs. Dua të shpreh falenderimin tim për eksperten Lori Kosiarek. Për punën që ka bërë. Zonja Kosiarek i ka bërë këto studente pjesë e jetës së saj dhe do të punojë në praktikë për ta. Më lini ta përsëri prapë, është një moment shumë i rëndësishëm i Shqipërisë, por edhe të diplomuarëve”, theksoi Kim.
Njësia e poligrafit brenda SHÇBA, sipas Kim, do nisë të kryejë kontrollet e kandidatëve për drejtorë të BKH më vonë gjatë javës, një hap për ta vënë tërësisht në zbatim "FBI"-në shqiptare.
Qeveria amerikanë do të vijojë gjithashtu të japë mbështetje të tjera për SPAK dhe njësitë e tjera si BKH-në.
“Sikurse me përparimin në fushat e tjera të reformës ne drejtesi, SHBA qëndrojnë vendosmërisht në krah të qeverise shqiptare për të larguar korrupsionin nga sistemi i drejtësisë penale. Sot jemi këtu me 5 persona, s’është numer i madh është thjesht një pikë uji, por i hedh sytë te busti i Skënderbeut, na e tregon këtë një legjendë, pak mijëra veta kundër një bote të tërë. Kështu që dua t’ju them të diplomuarve sot unë besoj tek ju dhe popullit shqiptar i them që unë besoj tek ju”, tha ambasadorja.
Makinës së të vërtetës do t'i nënshtrohen edhe efektivët e policisë. Ministri i Brendshëm, Sandër Lleshaj gjatë fjalës së tij në certifikimin e njësisë së ekspertëve të poligrafit tha se do të donte ta fillonte nga vetja.
“Ky instrument nuk do të përdoret vetëm për SPAK-un apo BKH, por do të përdoret në vijimësi për të gjithë rekrutimet e reja në policinë e shtetit SHÇBA, Gardën e Republikës, si dhe për diagnostifikimin periodik të të gjithë personave që shërbejnë në institucionet e sigurisë publike dhe do të doja të filloja nga vetja ime nëse do të merrej vendim”, tha në fjalën e tij ministri.
Pesë ekspertët e certifikuar janë:
Eriena Bashari
Erisa Llupi
Ferizklet Osmani
Erion Maksuti
Enton Radovani
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
