Pasi mblodhi përfaqësues të politikës shqiptare nga të gjitha trevat një ditë më parë në Lezhë, Kryeministri i ardhshëm i Kosovës, Albin Kurti nisi zyrtarisht fushatën për zgjedhjet e 25 prillit për Lëvizjen Vetëvedosje në Shqipëri. Kurti ndodhet në një vizitë tre-ditore në Shqipëri për të prezantuar kandidatët e kësaj lëvizjeje për zgjedhjet në Tiranë, Gjirokastër dhe Lezhë.
Ai është shfaqur krahas Bojken Abazit, drejtuesit të kësaj lëvizjeje në Shqipëri dhe kandidatit të Vetëvendosjes për deputet në Tiranë duke prezantuar platformën e tij dhe planet për fuqizimin e faktorit shqiptar në rajon. "Shqiptarët meritojnë më shumë", tha ai, duke theksuar se Vetëvendosje synon të jenë zëri i të vërtetës në Kuvendin e Shqipërisë.
Kuri tha se qendra e VV në Shqipëri po rritet dita ditës dhe tha se kjo do të reflektohet edhe në zgjedhjet e prillit. Kurti premtoi se për aq kohë sa ai të jetë në krye të Kosovës, Prishtina dhe Tiranë do të kenë marrëdhënien më të mirë dhe se do të angazhohe për bashkëpunim të ngushtë me kreministrin e Shqipërisë.
"Unë do të kem marrëdhënie më të mira që ka pasur ndonjë kryeministër me Tiranën Zyrtare me Kosovën e pas luftës", tha Kurti. “Do të fillojmë bashkëpunim me kryeministrin Edi Rama sepse ne do të formojmë qeverinë para zgjedhjeve këtu dhe do t’i trajtojmë më prioritet marrëveshjet e nënshkruara deri tani. Numri i tyre është i madh, është trefishor, por numri i memorandumeve që zbatohen është njëfishor”, u shpreh Kurti duke shtuar se ai do të bashkëpunonte me cilindo kryeministër, apo president në Tiranë.
I pyetur se cili ishte elektorati për të cilin po bëntë fushatë, ai tha se Vetëvendosje fliste për të gjithë shqiptarët e pakënaqur. “Shqiptarët kanë nevojë për një kandidat të pavarur, të paimplikuar dhe të pastër. Qarku i Tiranës duhet të votojë Bojken Abazin”, tha ai.
Kurti është shprehur se Shqipëria dhe Kosova kanë nevojë për gjithë përfshirje sociale dhe se populli shqiptar ka nevojë që të bëjmë bashkë tregun Kosovë-Shqipëri. Kurti tha se Shqipëria dhe Kosova kanë nevojë për komisione të përbashkëta parlamentare në politikën e jashtme, por edhe politikat tregtare, në mënyrë që produktet shqiptare të qarkullojnë lirshëm mes dy vendeve.
“Shqipëria është më e madhe se qeveria. Për nga numri i anëtarëve dhe në Tiranë jemi njësoj siç ishim në Prishtinë. Më lejoni t’ju falenderoj të gjithë aktivistët në Shqipëri që na kanë mbështetur e ndihmuar, mbrojtur në momentet më të vështira. Ndryshimet në Kosovë janë bërë. Shqipëria ka nevojë për ndryshime, shqiptarët meritojnë më shumë e më mirë. Sfidat në të cilat ne kemi kaluar me Bojkenin në Kosovë në organizime dhe aktivitete e kanë kalitur që ta përfaqësojë qytetarin në kuvendin në Shqipëri që ende nuk është mbyll tranzicioni. Ajo që kemi nevojë në Kosovë dhe në Shqipëri është gjithëpërfshirja sociale dhe pjesëmarrja qytetare,” ka thënë Kurti.
"Kemi nevojë për zhvillim sepse jemi vendet më të prapambetura në rajon. Ne vazhdojmë të mbahemi nga remitancat e emigrantëve. Edhe në Shqipëri edhe në Kosovë duhet t’i kthejmë shqiptarët”, tha ai.
Kurti deklaroi ndër të tjera se beson që ta kalojë shifrën prej 61 deputetëve, sa janë të nevojshme duke formuar kështu i vetëm qeverinë.
“Do të jemi më shumë se 60 deputetë. Me siguri do ta kemi deputetin e komunitetit egjiptian Elbert Krasniqin, me siguri do ta kemi deputeten e komunitetit boshnjak, Emilia Rexhepi, do t’i kemi edhe disa të tjerë. Na nevojiten 61, do ta kalojmë numrin 61. Nuk do të kemi nevojë për kompromise me eksponentët e regjimit të vjetër sepse populli e do që ai të bjerë”, tha Kurti.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.