A janë të sigurta Google, Amazon, Facebook, Apple dhe Microsoft?

Kompanitë e mëdha teknologjike si (Google, Amazon, Facebook, Apple, dhe Microsoft) kanë regjistruar dhe dëgjuar bisedat private të përdoruesve, deri në orët e vona të natës dhe sips tyre arsyeja ishte gjithmonë për “përmirësimin e shërbimeve”. Kohët e fundit u zbulua se Facebook, kishte dëgjuar bisedat personale të 50 qytetarëve evropiane, por numri i vërtetë i rasteve të tilla mendohet të jetë më i lartë. Gjithashtu, komisionari për mbrojtjen e të dhënave dhe lirinë e informacionit në Hamburg, Johannes Casper, tha në një deklaratë për shtyp se, edhe përdorimi i asistentëve automatike si Siri, Alex ose Google Assistant, po përbën një rrezik të madh për privatësinë e njerëzve. Sipas tij, përdorimi i këtyre pajisjeve në BE, duhet të përputhet me kërkesat mbrojtëse të të dhënave, nga GDPR (Rregullorja e Përgjithshme e Mbrojtjes së të Dhënave), për të përmbushur ligjin.

Më 13 gusht, rrjeti informativ Bloomberg raportoi se Facebook kishte punësuar njerëz për të përgjuar bisedat audio të përdoruesve të saj në Facebook Messenger. Ndër të tjera u bë me dije se kompania eka pranuar këtë fakt një javë më vonë.
“Ashtu si Apple dhe Google, ne ndaluam përgjimin e njerëzve më shumë se një javë më parë,” deklaroi një zëdhënës i Facebook për mediat britanike në mesin e muajit gusht.
Por autoriteti për mbrojtjen e të dhënave në Hamburg konfirmoi në një njoftim për shtyp këtë javë se, vlerësimi manual i bisedave private të përdoruesve, që janë përdorur nga Facebook është ende nën hetim. Autoritetet e Hamburgut dhe Irlandës ranë dakord që raste të tilla duhet të hetohen vazhdimisht nga autoritetet përkatëse kombëtare për mbrojtjen e të dhënave, pasi qytetarët kudo në botë nuk janë më të sigurt për rrjetet e tyre sociale.
“Secili shtet së bashku më autoritetet përkatëse për mbrojtjen e të dhënave, ka kompetencë individuale për të shqyrtuar çështje të tilla,” tha një zëdhënës nga Komisioni Irlandez për Mbrojtjen e të Dhënave.
Ndërsa një zëdhënëse e Komisionit Europian, deklaroi se të dhënat personale të qytetarëve duhet të jenë gjithnjë të sigurta dhe kjo është një tjetër detyrë e veçantë e Komisionit. Ajo shtoi se kjo ishte arsyeja kryesore pse ligji i BE-së për mbrojtjen e të dhënave u bë më i rreptë në 2016.
Të gjitha kompanitë teknologjike janë përballur me akuza të shumta gjatë këtij viti, për sa i përket regjistrimit të bisedave të përdoruesve dhe ekspertët e cilësojnë këtë fakti i të papranueshëm.
“Është fatale të mos ndjehesh i sigurt për asnjë program në telefon,” shprehen ata.

Sipas tyre, në prill të këtij viti u raportua se Amazon kishte një ekip punonjësish veçanërisht për të përgjuar bisedat e përdoruesve nëpërmjet Alexa, asistentin teknologjik të Amazon Echo. Shpjegimi i kompanisë për këtë fakt ishte se, kjo gjë ishte pjesë e projektit për të përmirësuar cilësinë. Gjithashtu, në të njëjtin muaj u bë e qartë se Google kishte kryer të njëjtin veprim për përdoruesit e tij dhe u zbuluan më shumë se 1000 audio bisedash personale të regjistruara përmes Google Assistant.
“Në i kemi sqaruar Google-it se kërkesat thelbësore për mbrojtjen e të dhënave për funksionimin e Google Assisant, aktualisht nuk janë përmbushur,” tha komisionari i Hamburgut Caspar të hënën e kaluar në një njoftim për shtyp.

Në një pasqyre të kësaj çështje, vetëm në tremujorin e parë të vitit 2019, ishin rreth 3.35 milion njerëz në të gjithë Europën që denoncuan këto raste. Për më tepër, punonjësit e Apple gjithashtu u kapën duke dëgjuar biseda personale si informacione konfideniale mjekësore, marrëveshje droge dhe rregjistrime të partnerëve që kryenin marrëdhënie seksuale. Shumica e përdoruesve ishin nga Kanadaja, Australia, Mbretëria e Bashkuar, por kishte edhe një pjesë të vogël që ishin nga shtetet e BE.
Ekspertët bëjnë me dije se 300 punonjës kanë humbur punën e tyre, në momentin që Apple njoftoi se do të pezullonte aktivitetin e tij për të përgjuar bisedat. Përveç Facebook, Amazon, Google e Apple edhe Microsoft, u akuzua se përgjonte bisedat e Skype, përmes asistentin teknologjik Cortana, që përdoruesit e përdorin për të mësuar më lehtësisht përdorimin e programeve të Microsoft. Sipas kompanisë kjo është në përputhje me GDRP, pasi përgjimet e zërave që ata kanë mbledhur janë anonime, por autoritetet irlandeze të të dhënave kanë konfirmuar se ata do të hetojnë mbi këtë çështje.
Tashmë Facebook dhe Apple kanë ndaluar punën e tyre për të gjitha vendet, Google e ka ndaluar atë vetëm në BE, ndërsa Amazon dhe Microsoft ju bëjnë thirrje ende përdoruesve ta pranojnë qasjen e tyre, për aq kohë sa zërat mbeten anonimë./Euobserver/

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.