.png)
Nga Gazeta 'Si'-Politikëbërësit e Bankës Qendrore Europiane pritet gjerësisht të lënë normat e interesit të pandryshuara kur të takohen sot(26 tetor) në Athinë.
Ky vendim do t'i jepte fund një serie prej 10 rritjesh të njëpasnjëshme që bëri që normat e interesit të rriten më shpejt dhe më shumë se kurrë.
Që nga korriku i vitit 2022, BQE ka rritur normat për të trajtuar inflacionin e nxitur kryesisht nga rritja e çmimeve të energjisë në vazhdën e pushtimit rus të Ukrainës.
Cikli i gjatë i shtrëngimit e ka lënë normën bazë të depozitave në katër për qind, pikën më të lartë në historinë e bankës qendrore.
Inflacioni i nxehtë i eurozonës ka filluar të qetësohet, duke rënë në 4.3 për qind në shtator nga kulmi i tij dyshifror në fund të vitit të kaluar.
Ndërsa shifra është ende më shumë se dyfishi i objektivit të BQE-së prej dy për qind, rritja e kostove të huamarrjes ka treguar gjithashtu shenja të rëndimit të bllokut të monedhës.
Projeksionet ekonomike të shtatorit të institucionit me bazë në Frankfurt rishikuan me tkurrje parashikimin për rritjen në eurozonë, ndërkohë që shpërthimi i konfliktit në Lindjen e Mesme ka mjegulluar më tej horizontin.
Si e tillë, BQE-ja nuk kishte gjasa të mendonte "seriozisht" për rritjen e normave përsëri në këtë moment "mes pasigurisë në rritje mbi perspektivën globale", tha analisti i Pictet Frederik Ducrozet.
Aktiviteti i biznesit në bllok ra në tetor, sipas një sondazhi të ndjekur nga afër të Indeksit të Menaxherëve të Blerjeve (PMI) të kryer nga S&P Global, duke rritur mundësinë e një recesioni të lehtë në gjysmën e dytë të 2023.
Bankat e Eurozonës gjithashtu kanë shtrënguar kriteret e tyre të kreditimit për individët dhe bizneset, sipas sondazhit të vetë BQE-së për institucionet financiare të publikuar këtë javë.
Presidentja e BQE-së, Christine Lagarde e ka pranuar "dhimbjen" e ndjerë nga konsumatorët si rezultat i rritjes agresive të normave, por ka paralajmëruar që të mos heqin dorë shumë shpejt.
Ndërsa inflacioni ka rënë, BQE nuk pret që ai të kthehet në objektivin prej dy për qind përpara vitit 2025, sipas parashikimeve të saj më të fundit.
Burimi: Bloomberg/Përshtati Gazeta Si
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
