Disa armë automatike, në numër ende të pakonfirmuar dhe një sasi granatash janë vjedhur nga baza ushtarake e Pashalimanit në Vlorë.
Akti është zbuluar të enjten një ditë para nisjes së radhës të ushtrisë shqiptare me mision në Egje.
Policia Ushtarake referoi dokumentat për ndjekje penale në Prokurinë e Rrethit Gjyqësor Vlorë në ngarkim të 5 personave. “Për shkelje të rregullave të shërbimit në objektetet e rëndësishme” si dhe u referuan materiale për veprën penale “Vjedhje”.
Grupe inspektimi nga ministria e Mbrojtjes kanë arritur pranë bazës ushtarake dhe po punojnë për inventarizimin e saktë të armëve.
Burime të pakonfirmuara ushtarake bëjnë të ditur se ushtari që duhej të ruante armët, nuk ndodhej në detyrë në momentin e ngjarjes.
Që të hysh në bazën ushtarake të Pashalimanit, duhet të kalohen 4 kontrolle, ndaj hetuesit dyshojnë se mund të bëhet fjalë për një person të brendshëm dhe që ka pasur informacion.
Aktualisht baza shërben për ankorimin e anijeve të rojes bregdetare shqiptare, duke qënë kështu baza më e rëndësishme ushtarake shqiptare.
Pas vjedhjes së armatimit në Pashaliman, Shtabi i Përgjithshëm i Forcave të Armatosura bën me dije se në bashkëpunim me Prokurorinë dhe Policinë e Shtetit kanë nisur zbardhjen e shkaqeve të ngjarjes brenda bazës ushtarake
“Shtabi i Përgjithshëm i Forcave të Armatosura dënon aktin por në të njëjtën kohë siguron se, ky rast sporadik, nuk ka dëmtuar sigurinë, gatishmërinë dhe operacionalitetin e Forcës Detare. Theksojmë edhe një herë se, papërgjeshmëria e ndonjë individi, qofshin ata efektivë të FA, nuk mund të njollosë figurën, modelin e përkushtuar dhe sakrificën e efektivëve të Forcës së Armatosur Shqiptare”, deklaron FA.
Sipas FA-ve, hetimi administrativ i nisur nga SHPFA po vijon dhe po merren të gjitha masat, që çdo person përgjegjës të ndëshkohet për çdo veprim apo mosveprim të tij, sipas ligjeve në fuqi.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
