.png)
Bashkimi Evropian planifikon të prezantojë një certifikatë për njohuritë mbi inteligjencën artificiale (AI) për nxënësit 15-vjeçarë, duke nisur nga viti shkollor 2027-2028.
Nisma synon t’i ndihmojë të rinjtë të kuptojnë funksionimin e kësaj teknologjie, të verifikojnë informacionin që ajo gjeneron, të dallojnë manipulimet dhe të kuptojnë kur duhet të ndalojnë përdorimin e saj.
“Kjo do t’i ndihmojë nxënësit e rinj të kuptojnë se si funksionon AI, të verifikojnë informacionin që ajo u ofron, të dallojnë manipulimet dhe të dinë se kur duhet ta ndërpresin përdorimin e saj”, deklaroi nënkryetarja e Komisionit Evropian, Roxana Minzatu.
Vendimi vjen në një kohë kur shkollat në mbarë botën po përballen me ndikimin gjithnjë e më të madh të inteligjencës artificiale në procesin mësimor.
Sipas statistikave të PISA 2025, rreth një në tre 15-vjeçarë në Bashkimin Evropian ka rezultate të dobëta në lexim-shkrim dhe matematikë. Përmes kësaj nisme, Brukseli synon të nxisë përdorimin e AI për të mbështetur mësuesit dhe për të përmirësuar të nxënit.
Megjithëse Bashkimi Evropian nuk ka kompetencë të drejtpërdrejtë mbi politikat arsimore të vendeve anëtare, ai po mbështet nismat për përfshirjen e sigurt të inteligjencës artificiale në shkolla.
Paralelisht, BE po promovon edhe legjislacion për të kufizuar qasjen e adoleshentëve të rinj në rrjetet sociale.
Minzatu theksoi se këto dy nisma nuk bien në kundërshtim me njëra-tjetrën, pasi inteligjenca artificiale mund të përdoret për mbështetje në mësimnxënie dhe edukim të personalizuar.
Sipas saj, këto përdorime arsimore ndryshojnë nga algoritmet e platformave sociale, të cilat mund të krijojnë varësi.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje