.png)
Presidenti i SHBA-së, Donald Trump, do të takohet këtë pasdite me homologun e tij francez, Emmanuel Macron, në Nju Jork, ku të dy liderët ndodhen për të marrë pjesë në punimet e Asamblesë së Përgjithshme të OKB-së.
Takimi është planifikuar për orën 17:35 me orën lokale, sipas agjendës së publikuar nga Shtëpia e Bardhë. Biseda mes dy liderëve pritet të përqendrohet në zhvillimet ndërkombëtare dhe disa prej krizave kryesore me të cilat përballet komuniteti ndërkombëtar.
Trump do të takohet më herët me Zoran Mamdanin, kryetarin e bashkisë së Nju Jorkut, i cili i përket krahut të majtë të Partisë Demokratike dhe ka kundërshtuar disa prej politikave të presidentit amerikan.
Ndërkohë, Macron mbërrin në Nju Jork nga Saint-Pierre-et-Miquelon, territori francez në Atlantikun e Veriut, ku të dielën u takua me kryeministrin kanadez Mark Carney.
Gjatë takimit, Macron dhe Carney mbrojtën sovranitetin kombëtar të vendeve të tyre dhe kërkuan forcimin e marrëdhënieve mes Francës dhe Kanadasë. Takimi u zhvillua në një kohë kur Trump ka bërë vazhdimisht deklarata lidhur me Kanadanë, përfshirë kërcënime për aneksimin e saj.
Në Nju Jork, Macron pritet të zhvillojë edhe një sërë takimesh dypalëshe. Përveç Trump, presidenti francez do të takohet me homologun ukrainas Volodymyr Zelensky dhe me udhëheqës të tjerë për të diskutuar krizën ndërkombëtare dhe situatën në Lindjen e Mesme.
Në fjalimin e tij në Asamblenë e Përgjithshme të OKB-së, Macron pritet të mbështesë forcimin e bashkëpunimit shumëpalësh dhe të aleancave mes shteteve.
Presidenca franceze ka shprehur shqetësimin për dobësimin e efektivitetit të mekanizmave shumëpalësh, duke vënë në dukje edhe përçarjet në rritje mes pesë anëtarëve të përhershëm të Këshillit të Sigurimit të OKB-së.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje