.png)
Presidenti amerikan Donald Trump ka deklaruar se lufta me Iranin nuk pritet të përfundojë para zgjedhjeve të mesmandatit në SHBA, që do të mbahen më 3 nëntor.
Duke folur me gazetarët gjatë udhëtimit drejt Teksasit, Trump tha se beson se konflikti do të përfundojë “menjëherë pas zgjedhjeve”, pasi sipas tij Irani nuk do të jetë në gjendje të rezistojë më.
Trump tha gjithashtu se çmimet e naftës pritet të mbeten të larta deri atëherë. “Menjëherë pas zgjedhjeve, çmimet e naftës do të bien ndjeshëm”, u shpreh presidenti amerikan.
Deklaratat vijnë në një moment kur çmimi i naftës ka arritur rreth 100 dollarë për fuçi, duke rritur shqetësimet për koston e karburanteve, transportit dhe produkteve të tjera në SHBA.
Trump argumentoi se lufta ishte e nevojshme për të penguar Iranin të zhvillojë armë bërthamore. Teherani, megjithatë, ka mohuar vazhdimisht se po kërkon të prodhojë armë bërthamore. Presidenti amerikan pretendoi gjithashtu se Irani po përpiqet të ndikojë në zgjedhjet amerikane, por nuk paraqiti prova për këtë akuzë.
Ndërkohë, presioni ndaj Trump për t’i dhënë fund konfliktit po rritet edhe brenda Partisë Republikane. Rritja e çmimeve të karburanteve dhe ndikimi në ekonomi kanë nisur të ndikojnë në mbështetjen për presidentin.
Luftimet janë intensifikuar ditët e fundit. Ushtria amerikane tha se kishte goditur pesë cisterna nafte të lidhura me Iranin, ndërsa Teherani kreu sulme ndaj dy anijeve luftarake amerikane dhe disa cisternave në Ngushticën e Hormuzit.
Edhe rebelët Huthi në Jemen, të lidhur me Iranin, kanë ndërmarrë sulme ndaj objektivave në Arabinë Saudite, përfshirë instalacione nafte.
Konflikti, tashmë në muajin e shtatë, ka rritur ndjeshëm pasigurinë në tregjet globale dhe ka shtuar frikën se çmimet e larta të energjisë mund të ndikojnë edhe në normat e interesit në SHBA.
Zgjedhjet e mesmandatit do të zhvillohen më 3 nëntor, ndërsa republikanët rrezikojnë të humbasin kontrollin mbi Kongresin.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje