.png)
Nga Gazeta ‘Si’- Qeveria ka arkëtuar 410.6 miliardë lekë gjatë gjashtëmujorit të parë të vitit 2026, duke regjistruar një rritje prej 44.5 miliardë lekësh ose 12.2% krahasuar me të njëjtën periudhë të një viti më parë.
Pjesa më e madhe e të ardhurave erdhi nga Tatimet dhe Doganat, të cilat mblodhën 260.1 miliardë lekë, 1.7% mbi planin dhe 7.3% më shumë se në gjashtëmujorin e parë të vitit 2025. Administrata tatimore arkëtoi 141.5 miliardë lekë, me një rritje vjetore prej 10%, ndërsa të ardhurat neto nga TVSH-ja në vend u rritën me 25.4%, duke arritur në 41.6 miliardë lekë. Edhe tatimi mbi të ardhurat personale vijoi rritjen, duke arritur në 47.6 miliardë lekë, ose 16.6% më shumë se një vit më parë.
Ndërkohë, të ardhurat nga fondet speciale, që përfshijnë sigurimet shoqërore dhe shëndetësore, arritën në 99.2 miliardë lekë, me një rritje prej 13.3% krahasuar me të njëjtën periudhë të vitit 2025. Të ardhurat e mbledhura nga administrata doganore u realizuan në 118.6 miliardë lekë, ose 4.3% më shumë në bazë vjetore.
Të dhënat tregojnë se ritmi i rritjes së të ardhurave ka qenë më i lartë se ai i shpenzimeve edhe gjatë gjashtëmujorit të parë të vitit, duke rezultuar në një suficit buxhetor prej rreth 52.8 miliardë lekësh.
Nga ana e shpenzimeve, qeveria shpenzoi 357.8 miliardë lekë në gjashtë muajt e parë të vitit, 7.5% më shumë se në të njëjtën periudhë të vitit të kaluar, por me një realizim prej 97.4% të planit. Shpenzimet korente arritën në 321.1 miliardë lekë, ndërsa ato kapitale, të lidhura kryesisht me investimet publike, u realizuan në 36.8 miliardë lekë, me një rritje prej 10.2% krahasuar me një vit më parë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje