.png)
Nga Gazeta Si- Humbja e dëgjimit nuk lidhet vetëm me koncertet e zhurmshme apo profesionet me ekspozim të lartë ndaj zhurmës. Sipas ekspertëve, edhe aktivitetet e zakonshme të përditshme, nga përdorimi i kufjeve deri te kositja e barit apo ngarja e makinës me xhamat hapur, mund të shkaktojnë dëmtime të përhershme të dëgjimit.
Valerie Pavlovich Ruff, ORL, paralajmëron se, ndryshe nga muskujt, dëgjimi nuk mund të rikuperohet. “Pasi humbet, humbet përgjithmonë”, shprehet ajo, duke shpjeguar se qelizat e vogla të veshit të brendshëm, të cilat transmetojnë tingullin në tru, nuk rigjenerohen pasi dëmtohen nga zhurmat e forta.
Ekspertët po vërejnë gjithnjë e më shumë raste të humbjes së dëgjimit edhe te të rinjtë, madje edhe te fëmijët. Një nga shkaqet kryesore mbetet përdorimi i kufjeve me volum të lartë për periudha të gjata. Sipas studimeve, mbi 1.3 miliardë persona nën moshën 35 vjeç mund të jenë në rrezik për humbje të parakohshme të dëgjimit për shkak të ekspozimit të vazhdueshëm ndaj tingujve të fortë.
Ekspertët këshillojnë që muzika të dëgjohet në një nivel ku është ende e mundur të komunikohet me dikë pranë. Nëse personi tjetër duhet të bërtasë që të dëgjohet, volumi është tepër i lartë.
Përveç kufjeve, rrezik paraqesin edhe koncertet, stadiumet sportive, veglat elektrike të kopshtarisë, sharrat mekanike dhe pajisjet e tjera të zhurmshme. Në këto raste rekomandohet përdorimi i tapave ose mbrojtëseve profesionale të veshëve, të cilat reduktojnë nivelin e zhurmës pa penguar dëgjimin e tingujve të rëndësishëm.
Ekspertët paralajmërojnë edhe për një zakon të përhapur gjatë verës: ngarjen e makinës me xhamat hapur në autostradë. Zhurma e erës, e kombinuar me radion në volum të lartë, mund të dëmtojë gradualisht dëgjimin, sidomos në njërin vesh.
Një tjetër këshillë lidhet me higjienën e veshëve. Mjekët nuk rekomandojnë përdorimin e shkopinjve pambuku për pastrimin e kanalit të veshit, pasi ato mund të shtyjnë dyllin më thellë, duke shkaktuar bllokime ose infeksione. Nëse dyshohet për grumbullim të dyllit, pastrimi duhet të kryhet nga një profesionist shëndetësor.
Sipas specialistëve, shenjat e para që nuk duhen neglizhuar janë vështirësia për të ndjekur bisedat në ambiente të zhurmshme dhe zhurma e vazhdueshme në veshë (tinitusi). Në këto raste rekomandohet kryerja sa më e hershme e një testi dëgjimi, pasi diagnostikimi në kohë ndihmon në kufizimin e përkeqësimit të mëtejshëm.
Këshilla tradicionale është që të bëni një kontroll para se të mbushni 60 vjeç, por humbja e dëgjimit mund të ndodhë në çdo moshë. 30-vjeçarët dhe njerëzit edhe më të rinj duhet ta kenë parasysh nëse kanë probleme pas një bisede në mjedise të zhurmshme.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje