.png)
Nga Gazeta ‘Si’- Protesta e qytetarëve para Kuvendit të Shqipërisë ka hyrë në një fazë më të tensionuar paraditen e së martës, ku pjesëmarrësit kanë bllokuar tre hyrjet kryesore të godinës, duke rrethuar praktikisht institucionin parlamentar gjatë zhvillimit të seancës plenare.
Tubimi, i cili nisi në orën 10:00, është shoqëruar me përshkallëzim të vazhdueshëm të situatës, ndërsa forcat e Policisë janë vendosur në perimetrin e Kuvendit për të garantuar aksesin dhe funksionimin e institucionit.
Sipas raportimeve nga terreni, protestuesit kanë arritur të bllokojnë tre dyert kryesore të Kuvendit, përfshirë edhe hyrjen qendrore, duke krijuar një rrethim të plotë të godinës ku zhvillohen punimet parlamentare.
Ky veprim ka sjellë ndërhyrjen e menjëhershme të forcave të rendit, të cilat janë përplasur fizikisht me protestuesit në përpjekje për të liruar hyrjet dhe për të garantuar kalimin e deputetëve dhe stafit administrativ.
Gjatë momentit të tensionit, protestuesit dhe efektivët e Policisë janë përfshirë në shtyrje dhe përplasje të drejtpërdrejta, ndërsa situata në disa momente është përshkallëzuar në kaos të kontrolluar nga forcat e rendit.
Sipas pamjeve nga vendngjarja, Policia ka provuar të zhvendosë protestuesit nga hyrjet kryesore, ndërsa këta të fundit kanë vijuar rezistencën në formë të bllokadës simbolike të institucionit.
Protesta vijon prej më shumë se dy orësh, ndërsa qytetarët kanë deklaruar se tubimi është pjesë e një aksioni më të gjerë që ka hyrë në ditën e 31-të radhazi të mobilizimit.
Gjatë protestës u dëgjuan thirrje të vazhdueshme si “Rama jep dorëheqjen”, “Poshtë diktatura” dhe “Parlament i krimit”, ndërsa protestuesit shprehën pakënaqësi ndaj klasës politike dhe vendimmarrjes së Kuvendit.
Tubimi u zhvillua në kushte të temperaturave të larta dhe nën një prani të shtuar të forcave të policisë, të cilat kishin vendosur kordon sigurie rreth godinës së parlamentit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje