.png)
Nga Gazeta Si- Dhimbja e mprehtë e kokës që shumë njerëz përjetojnë kur hanë akullore ose konsumojnë pije shumë të ftohta njihet si “brain freeze- ngrirja e trurit” ose dhimbje koke nga stimuli i të ftohtit. Edhe pse zakonisht është e padëmshme dhe zgjat vetëm pak sekonda, studiuesit thonë se ky fenomen mund të japë informacione të rëndësishme për shëndetin neurologjik të një personi.
Sipas ekspertëve, dhimbja shkaktohet kur qiellza e gojës ose pjesa e pasme e fytit ftohet shumë shpejt. Kjo bën që enët e gjakut të tkurren dhe më pas të zgjerohen menjëherë për të rikthyer qarkullimin normal të gjakut. Ky proces aktivizon nervin trigeminal, i cili transmeton sinjalet e dhimbjes në fytyrë dhe ballë, duke krijuar ndjesinë karakteristike të “ngrirjes së trurit”.
Studimet kanë zbuluar se jo të gjithë njerëzit preken njësoj. Shkencëtarët kanë gjetur se prirja për të përjetuar këtë lloj dhimbjeje mund të jetë e trashëguar në familje.
Një tjetër zbulim i rëndësishëm është lidhja e fortë mes ngrirjes së trurit dhe migrenës. Personat që vuajnë nga migrena kanë shumë më tepër gjasa të përjetojnë dhimbje koke nga akullorja dhe zakonisht i ndjejnë ato më intensivisht.
Kjo ndodh sepse nervi trigeminal tek këta persona është më i ndjeshëm ndaj stimujve të ndryshëm, përfshirë të ftohtin.
Pikërisht për shkak të kësaj lidhjeje, studiuesit kanë përdorur prej dekadash “ngrirjen e trurit” si një mjet për të studiuar migrenën.
Duke qenë se kjo dhimbje mund të shkaktohet lehtësisht në kushte laboratorike, ajo ka ndihmuar shkencëtarët të kuptojnë më mirë mekanizmat që qëndrojnë pas dhimbjeve të kokës dhe rolin e nervave dhe enëve të gjakut në shfaqjen e tyre.
Ekspertët theksojnë se dhimbjet e forta dhe të shpeshta nga akullorja nuk janë domosdoshmërisht shqetësuese, por mund të jenë një arsye për t’i kushtuar më shumë vëmendje historikut personal të dhimbjeve të kokës.
Shumë persona që vuajnë nga migrena nuk janë diagnostikuar kurrë, pavarësisht se ekzistojnë trajtime efektive. Për këtë arsye, nëse dhimbjet e kokës janë të shpeshta ose intensive, një konsultë me mjekun mund të ndihmojë në identifikimin e një problemi të mundshëm neurologjik.
Për të shmangur “ngrirjen e trurit”, specialistët rekomandojnë konsumimin më të ngadaltë të ushqimeve dhe pijeve të ftohta, duke i dhënë kohë qiellzës së gojës të përshtatet me temperaturën. Nëse dhimbja shfaqet, ngrohja e qiellzës me gjuhë ose konsumimi i një pijeje të ngrohtë mund ta lehtësojë atë më shpejt. Në fund, ekspertët sigurojnë se nuk ka arsye të hiqni dorë nga akullorja- mjafton ta shijoni më ngadalë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje