.png)
Nga Gazeta Si- Një pilulë eksperimentale e quajtur daraksonrasib po sjell shpresa të reja për trajtimin e kancerit të pankreasit, një nga format më agresive dhe vdekjeprurëse të sëmundjes.
Sipas një studimi të ri të publikuar në New England Journal of Medicine dhe të prezantuar në takimin vjetor të Shoqatës Amerikane për Onkologji Klinike, ilaçi arriti pothuajse të dyfishojë kohën e mbijetesës së pacientëve me kancer pankreatik metastatik, krahasuar me kimioterapinë tradicionale.
Në studim morën pjesë rreth 500 pacientë, tek të cilët trajtimet e mëparshme nuk po jepnin më rezultat. Pacientët që morën daraksonrasib jetuan mesatarisht 13.2 muaj, ndërsa ata që vazhduan me kimioterapi jetuan mesatarisht 6.7 muaj. Përveç zgjatjes së jetës, pacientët raportuan më pak dhimbje, cilësi më të mirë jetese dhe tkurrje të tumoreve.
Ilaçi vepron duke bllokuar proteinat e mutuara KRAS, të cilat nxisin rritjen e tumorit në më shumë se 90% të rasteve të kancerit të pankreasit. Për dekada me radhë, këto mutacione konsideroheshin pothuajse të pamundura për t’u trajtuar me ilaçe.
Ekspertët e onkologjisë e kanë cilësuar zbulimin si një moment të rëndësishëm për trajtimin e kësaj sëmundjeje. Disa prej tyre thanë se rezultatet janë aq mbresëlënëse sa ilaçi mund të bëhet standardi i ri i trajtimit për pacientët me kancer.
Studiuesit po shqyrtojnë gjithashtu përdorimin e tij në fazat më të hershme të sëmundjes, me shpresën se mund të ndihmojë më shumë pacientë të bëhen kandidatë për operacion.
Kanceri i pankreasit mbetet një nga sëmundjet më vdekjeprurëse, pasi shpesh zbulohet vetëm pasi është përhapur në organe të tjera.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje