.png)
Gazeta Si – Zyra e prokurorit federal të Miamit, ka ngritur padi ndaj ish-presidentit kubanez, Raul Castro, vëllait 94-vjeçar të udhëheqësit historik, Fidel Castro, i cili, pavarësisht se nuk mban më një post zyrtar, ende konsiderohet një figurë me ndikim në qeverinë komuniste të ishullit.
Shtetet e Bashkuara të Amerikës, e mbajnë atë përgjegjës për rrëzimin në vitin 1996 të dy aeroplanëve të vegjël që i përkisnin një organizate me bazë në SHBA që ofronte ndihmë dhe lehtësim për njerëzit që largoheshin nga Kuba nëpërmjet detit.
Tre shtetas amerikanë dhe një banor i SHBA-ve u vranë në aksident. Castro akuzohet për komplot për vrasjen e shtetasve amerikanë, vrasje dhe shkatërrim të një avioni. Pesë persona të tjerë, identiteti i të cilëve nuk dihet, janë akuzuar gjithashtu.
Lajmi për padinë e mundshme ndaj Castros, kishte qarkulluar tashmë gjatë fundjavës dhe përfaqëson një përshkallëzim të presionit të fundit të qeverisë amerikane mbi regjimin komunist kuban.
Për muaj të tërë, Donald Trump ka kërcënuar të “marrë Kubën” dhe është përpjekur të arrijë “ndryshim regjimi” në ishull me masa radikale, si ndërprerja e furnizimit me karburant.
Presioni është rritur gjatë javës së kaluar, me fluturime të shpeshta ushtarake zbulimi rreth ishullit dhe një vizitë të pazakontë në Havana nga drejtori i CIA-s, John Ratcliffe, i cili i bëri thirrje qeverisë kubaneze të mbyllë stacionet e inteligjencës ruse dhe kineze atje.
Një padi federale ishte baza ligjore e përdorur nga administrata Trump për të kryer operacionin që çoi në kapjen e Nicolás Maduro janarin e kaluar dhe krijimin e një qeverie më bashkëpunuese në Venezuelë me Shtetet e Bashkuara.
Megjithatë, për momentin, nuk ka gjasa që Shtetet e Bashkuara të Amerikës të marrin në konsideratë kapjen e Castros siç bënë me Maduron.
Padia ndaj tij përbën kryesisht një kërcënim psikologjik për qeverinë komuniste, e cila, megjithatë, rrezikon të kompromentojë negociatat tashmë komplekse me qeverinë e presidentit Miguel Díaz-Canel.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje