.png)
Gazeta Si – Që nga fillimi i marsit, sipas një raporti të CNN që citon burime të inteligjencës perëndimore, “Kremlini ka qenë i shqetësuar për rrjedhjen e informacionit të ndjeshëm, rrezikun e një komploti dhe një përpjekje për grusht shteti kundër presidentit rus”.
Ndër anëtarët e elitës politike ruse që shqetësojnë Vladimir Putinin është Sergei Shoigu, një ish-bashkëpunëtor i ngushtë i presidentit.
Ish-ministri i Mbrojtjes, aktualisht Sekretar i Këshillit të Sigurisë, “është i lidhur me rrezikun e një grushti shteti, pasi ai mban ndikim të konsiderueshëm brenda komandës së lartë ushtarake”, thuhet në raport.
Dokumenti shton se arrestimi i Ruslan Tsalikov, ish-zëvendës i Shoigut, më 5 mars, konsiderohet “një shkelje e marrëveshjeve të heshtura të mbrojtjes midis elitave, gjë që e dobëson Shoigun dhe rrit gjasat që ai vetë të bëhet subjekt i një hetimi gjyqësor”.
Por ashtu, sipas raportit, të siguruar nga CNN, Kremlini ka rritur në mënyrë drastike sigurinë personale të presidentit rus, Vladimir Putin, duke instaluar sisteme mbikëqyrjeje në shtëpitë e ndihmësve të tij më të ngushtë.
Kjo është pjesë e masave të reja të miratuara pas një vale vrasjesh të zyrtarëve të lartë ushtarakë rusë dhe frikës nga një grusht shteti.
Sipas raportit, kuzhinierët, truprojat dhe fotografët që punojnë me presidentin, gjithashtu ndalohen të përdorin transportin publik.
Vizitorët e shefit të Kremlinit duhet t’i nënshtrohen kontrolleve të dyfishta dhe ata që punojnë ngushtë me të lejohen vetëm të përdorin telefona celularë pa qasje në internet.
Disa nga masat u futën në muajt e fundit pas vrasjes së një gjenerali të lartë në dhjetor, një ngjarje që shkaktoi një mosmarrëveshje brenda establishmentit rus të sigurisë.
Këto masa sugjerojnë pakënaqësi në rritje brenda Kremlinit, i cili po përballet me probleme gjithnjë e më urgjente si brenda ashtu edhe jashtë vendit, duke përfshirë vështirësitë ekonomike, shenjat në rritje të mospajtimit dhe pengesat në fushën e betejës në Ukrainë.
Zyrtarët rusë të sigurisë, thuhet se kanë ulur në mënyrë drastike numrin e vendeve që Putini viziton rregullisht.
Ai dhe familja e tij kanë ndaluar udhëtimet për në rezidencat e tyre të zakonshme në rajonin e Moskës dhe për në Valdai, rezidencën e izoluar verore të presidentit të vendosur midis Shën Petersburgut dhe kryeqytetit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje