.png)
Nga Gazeta Si- Parkinsoni po prek edhe njerëzit nën 50 vjeç. Mjeku neurolog Genci Çakçiri ka ngritur shqetësimin për rritjen e rasteve, veçanërisht tek personat nën moshën 50 vjeç. Sipas tij, vitet e fundit është vërejtur një shtim i dukshëm i diagnozave në këtë grupmoshë, çka tregon se sëmundja nuk prek më vetëm moshat e treta, siç mendohej tradicionalisht.
Ai thekson se kjo tendencë në rritje kërkon më shumë vëmendje dhe ndërgjegjësim, pasi diagnostikimi i hershëm është kyç për menaxhimin e sëmundjes.
Në shumë raste, forma e Parkinsonit që shfaqet në moshë të re lidhet me faktorë gjenetikë, ndaj njohja e shenjave të para bëhet edhe më e rëndësishme.
Parkinsoni mbetet një ndër sëmundjet neurodegjenerative më të shpeshta në botë, e dyta pas Alzheimer, dhe karakterizohet nga një rritje e vazhdueshme e prevalencës. Shenjat kryesore përfshijnë ngadalësimin e lëvizjeve, ngurtësinë muskulare dhe dridhjet, të cilat zakonisht shfaqen në njërën anë të trupit.
“Një tregues i rëndësishëm për diagnozën është dridhja e dorës në gjendje qetësie, që ndihmon në diferencimin nga çrregullime të tjera”, thotë mjeku.
Rreziku për zhvillimin e sëmundjes rritet me moshën, megjithatë rastet tek të rinjtë po bëhen gjithnjë e më të shpeshta. Për këtë arsye, mjeku Çakçiri këshillon që çdo shenjë e dyshimtë të merret seriozisht dhe të kërkohet konsultë mjekësore që në fazat e hershme.
Në përballimin e Parkinsonit, rol të rëndësishëm luan edhe mbështetja e familjarëve.
Mjeku Çakçiri thotë se ata duhet të jenë të kujdesshëm në ndjekjen e trajtimit dhe të ofrojnë mbështetje morale të vazhdueshme për personin e prekur. Gjithashtu, aktiviteti fizik dhe fizioterapia janë thelbësore për ruajtjen e funksioneve motorike dhe përmirësimin e cilësisë së jetës së pacientëve.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje