.png)
Gazeta Si – “Spastrimet” ndodhin edhe në nivelet më të larta të ushtrisë amerikane. Pas riorganizimit të vogël të kabinetit të Trump, i cili fillimisht shkarkoi Sekretaren e Sigurisë Kombëtare, Kristi Noem dhe më pas, të enjten, Prokuroren e Përgjithshme dhe Sekretaren e Drejtësisë, Pam Bondi, edhe Shefi i Mbrojtjes, Pete Hegseth po bën spastrime.
Ai njoftoi fillimisht se i kishte kërkuar Randy George, Shefit të Shtabit të Ushtrisë amerikane – autoriteti më i lartë ushtarak në vend – të jepte dorëheqjen.
Më pas ai shkarkoi dy gjeneralë të tjerë: Gjeneral Major, William Green dhe komandantin e Komandës së Transformimit dhe Stërvitjes së Ushtrisë, David Hodne.
Zëdhënësi i Pentagonit, Sean Parnell, tha në një deklaratë në mediat sociale se Randy George do të dalë në pension nga pozicioni i tij si Shefi i 41-të i Shtabit të Ushtrisë “duke filluar menjëherë”.
Mandati i Shefit të Shtabit të Ushtrisë është normalisht katër vjet. George, një oficer karriere dhe i diplomuar në Akademinë Ushtarake West Point, u nominua për këtë rol në vitin 2023 nga Joe Biden.
Arsyeja e kërkesës për dorëheqje nuk është ende e qartë. Parnell deklaroi vetëm se “Departamenti i Luftës është mirënjohës ndaj Gjeneralit George për dekadat e tij të shërbimit ndaj kombit tonë. I urojmë atij fat të mbarë në pension”.
Ky “riorganizim ushtarak” vjen në mes të luftës në Iran: pasi Trump, në një fjalim drejtuar kombit, deklaroi se lufta do të përfundojë “shumë shpejt”.
George shërbeu si oficer këmbësorie në Luftën e parë të Gjirit dhe në konfliktet e fundit në Irak dhe Afganistan.
Sipas mediave amerikane, zëvendësi i tij, gjenerali Christopher LaNeve, do të marrë detyrën e Shefit të Shtabit në detyrë.
Që kur mori detyrën në Pentagon, Hegseth ka shkarkuar zyrtarë të shumtë. Vitin e kaluar, Gjenerali Lejtnant i Forcave Ajrore, Jeffrey Kruse, kreu i Agjencisë së Inteligjencës së Mbrojtjes të Pentagonit, u lirua nga detyrat e tij pasi një vlerësim fillestar nga agjencia në qershor, tregoi se sulmet e SHBA-ve kundër objekteve bërthamore iraniane kishin qenë më pak të gjera nga sa kishte pretenduar Trump.
Më parë, Zëvendës Admiralja, Shoshana Chatfield, përfaqësuesja ushtarake amerikane në Komitetin Ushtarak të NATO-s, ishte shkarkuar për shkak të “humbjes së besimit në aftësitë e saj udhëheqëse”; Gjenerali i Forcave Ajrore, Timothy Haugh, i cili drejtoi Agjencinë e Sigurisë Kombëtare dhe Komandën Kibernetike të SHBA-ve; Admiralja Lisa Franchetti, komandante e Marinës; dhe Admiralja Linda Fagan, kreu i Rojës Bregdetare.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje