.png)
Gazeta Si – Misioni i Kombeve të Bashkuara në Liban (UNIFIL) tha se një nga paqeruajtësit e tij u vra të dielën nga një shpërthim predhe pranë një poste në zonën Aadchit El Qsair, në jug të vendit.
Paqeruajtësit janë ushtarë të vendosur nga OKB-ja për të ruajtur paqen në zona specifike të botës. Sipas raportimeve, një tjetër ushtar u plagos rëndë.
UNIFIL vepron në zonën kufitare midis Izraelit dhe Libanit për të siguruar respektimin e kufirit dhe për të kërkuar një armëpushim të qëndrueshëm midis dy vendeve.
Kjo është një zonë e sulmeve të shpeshta të ndërsjella midis ushtrisë izraelite dhe grupit politik dhe ushtarak libanez, Hezbollah.
Ministria e Jashtme indoneziane, konfirmoi se personi i vrarë ishte një shtetas indonezian. Në një deklaratë, UNIFIL shpjegoi se origjina e predhës është e pasigurt dhe tha se ka nisur një hetim për të sqaruar situatën.
Misioni UNIFIL u krijua nga Këshilli i Sigurimit i Kombeve të Bashkuara në vitin 1978 dhe është rinovuar disa herë që atëherë.
Sot, ai punëson afërsisht 10,000 ushtarë nga 50 vende të ndryshme, si dhe disa qindra civilë libanezë dhe ndërkombëtarë që punojnë në bazat e tij.
Në vjeshtën e vitit 2024, gjatë sulmeve reciproke midis Izraelit dhe Hezbollahut, u goditën edhe disa baza të UNIFIL dhe në një rast, katër ushtarë italianë u plagosën lehtë.
Gushtin e kaluar, Këshilli i Sigurimit i OKB-së vendosi të tërheqë gradualisht personelin e vendosur në Liban deri në fund të vitit 2027.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje