.png)
Nga Gazeta ‘Si’- Sekretari i Shtetit i SHBA-së, Marco Rubio, u tha ministrave të jashtëm të G7 sot se lufta me Iranin do të vazhdojë për dy deri në katër javë të tjera.
Tre burime me njohuri të drejtpërdrejta për çështjen i thanë ‘Axios’ se Rubio pretendoi gjatë takimit të së premtes në Francë se SHBA-të janë afër fillimit të negociatave serioze me Iranin.
Më vonë, në deklaratat pas takimit të G7, vazhdon ‘Axios’, Rubio tha se SHBA-të presin që lufta të përfundojë brenda “javëve, jo muajve”.
Ai shtoi gjithashtu se SHBA-të po presin sqarime se kush do ta përfaqësojë Iranin në bisedimet e mundshme të paqes. Me shumë mundësi, zëvendëspresidenti Vance do ta udhëheqë misionin.
I pyetur për mundësinë e një pushtimi të mundshëm tokësor të Iranit nga SHBA-të, theksoi se:
“Ne mund t’i arrijmë të gjitha objektivat tona pa forca tokësore. Megjithatë, ne do të jemi gjithmonë të gatshëm t’i ofrojmë presidentit fleksibilitetin maksimal të mundshëm dhe aftësinë maksimale për t’u përshtatur me situata të paparashikuara, nëse ato lindin”.
“Nuk e dimë kush vendos në Teheran”
Lidhur me bisedimet, sekretari i shtetit amerikan tha se SHBA-të ende po komunikojnë me Iranin nëpërmjet ndërmjetësve, dhe jo drejtpërdrejt. Megjithatë, ai vuri në dukje se nuk është e qartë se kush po i merr realisht vendimet në Teheran tani .
Rubio shtoi se ka dy zyrtarë iranianë që janë të gatshëm të negociojnë me SHBA-në, por ata kanë nevojë për miratimin e udhëheqjes së lartë.
Ai tha se është e vështirë për ndërmjetësit të komunikojnë me zyrtarët iranianë, pasi ata shmangin përdorimin e telefonave të tyre nga frika se mos gjurmohen dhe vriten. Kjo ka ngadalësuar ritmin e komunikimeve, tha Rubio, sipas burimeve.
SHBA-Izrael bombarduan uzinat e uraniumit në Iran
SHBA-të dhe Izraeli bombarduan gjithashtu një uzinë pasurimi të uraniumit në Iran
Organizata e Energjisë Atomike e Iranit njoftoi se sulmet ajrore amerikane dhe izraelite goditën gjithashtu një uzinë të pasurimit të uraniumit në Iranin qendror.
Uzina e Ardakanit, e vendosur në provincën Yazd, “u shënjestrua nga një sulm i kryer pak minuta më parë nga armiku amerikan sionist”, tha organizata në kanalin e saj Telegram, duke shtuar se sulmi “nuk shkaktoi lirimin e materialeve radioaktive”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje