.png)
Nga Gazeta ‘Si’– Presidenti amerikan Donald Trump deklaroi se është në bisedime me disa vende për të patrulluar dhe “policuar” Ngushticën e Hormuzit, një nga korridoret më të rëndësishme për transportin global të naftës.
Donald Trump ka paralajmëruar se e ardhmja e NATO-s mund të jetë “shumë e keqe” nëse aleatët nuk kontribuojnë për sigurimin e Ngushticës së Hormuzit, një nga rrugët më të rëndësishme të transportit të naftës në botë.
Gjatë fluturimit të natës drejt Uashingtonit, Trump u tha gazetarëve se ka folur me “rreth shtatë” vende për këtë çështje. Ai përmendi veçanërisht Kinën, duke theksuar se Pekini është shumë i varur nga furnizimet me naftë që kalojnë përmes kësaj rruge detare.
Megjithëse nuk përmendi vendet e tjera me të cilat ka kontaktuar, presidenti amerikan iu referua NATO-s dhe shteteve të tjera që, sipas tij, duhet të “mbrojnë territorin e tyre”.
Më herët, në një intervistë për Financial Times, Trump tha se është “plotësisht e përshtatshme” që vendet që përfitojnë nga Ngushtica e Hormuzit të ndihmojnë për rihapjen dhe sigurimin e saj.
Ai paralajmëroi se nëse nuk do të ketë reagim nga vendet e tjera, kjo mund të jetë “shumë e keqe për të ardhmen e NATO-s”, duke shtuar se SHBA-të kanë qenë “shumë të sjellshme” me aleatët europianë.
“Ne nuk kishim pse t’i ndihmonim me Ukrainën. Ukraina është mijëra kilometra larg nesh… Por ne i ndihmuam. Tani do të shohim nëse ata do të na ndihmojnë ne”, tha Trump.
Ai shtoi gjithashtu: “Unë kam thënë prej kohësh se ne do të jemi aty për ta, por ata mund të mos jenë aty për ne. Dhe nuk jam i sigurt se do të ishin”.
Komentet e Trump vijnë vetëm një ditë pasi ai u bëri thirrje Kinës, Francës, Japonisë, Koresë së Jugut dhe Mbretërisë së Bashkuar që të bashkohen në një “përpjekje të përbashkët” për të hapur dhe siguruar Ngushticën e Hormuzit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje