Ekspertët: Hezitimi ndaj vaksinimit po nxit përhapjen e fruthit

Agjencitë shëndetësore paralajmërojnë se fruthi mbetet një sfidë në Europë pavarësisht një rënieje në vitin 2025, duke kërkuar veprime urgjente kundër hezitimit ndaj vaksinimit.

Fruthi, një sëmundje që shpesh harrohet, mbetet një sfidë në të gjithë kontinentin. Rastet në rajonin europian të Organizatës Botërore të Shëndetësisë kanë rënë në vitin 2025 krahasuar me vitin e kaluar, megjithatë ekspertët paralajmërojnë se rreziku i shpërthimeve vazhdon.

Në vitin 2024, në Europë u raportuan 127,350 raste të fruthit, raportet më të larta që nga viti 1997.

Edhe pse rastet ranë në vitin 2025, infeksionet e raportuara ishin dy herë më të larta se në vitin 2023, paralajmëron Qendra Europiane për Parandalimin dhe Kontrollin e Sëmundjeve (ECDC).

“Europa duhet të udhëheqë botën në eliminimin e fruthit”, tha Sabrina Bacci, drejtuese e programit të ECDC për sëmundjet e parandalueshme nga vaksina dhe imunizimin.

Ajo shtoi se Europa ka një vaksinë shumë efektive dhe të sigurt, si dhe njohuritë, burimet dhe disa nga mjetet më të fuqishme të mbikëqyrjes për të kontrolluar këtë sëmundje të parandalueshme.

Për të parandaluar shpërthimet dhe për të mbrojtur ata që janë veçanërisht të prekshëm ndaj fruthit, siç janë fëmijët shumë të vegjël për t’u vaksinuar dhe ata që nuk mund të vaksinohen për arsye mjekësore, të paktën 95 për qind e popullsisë së përshtatshme duhet të marrë dy doza të vaksinës.

Megjithatë, ECDC vëren se 8 në 10 persona që u sëmurën me fruth gjatë vitit 2025 nuk ishin vaksinuar, duke pasqyruar modelin e vërejtur në vitin 2024.

“Vaksinimi individual mbron të tjerët që nuk mund të vaksinohen, pasi zvogëlon përhapjen e infeksioneve. Kjo e bën vaksinimin jo vetëm një akt vetëmbrojtës, por edhe një akt solidariteti. Eliminimi i fruthit duhet të jetë i mundur nëse veprojmë së bashku”, shtoi Bacci.

Fruthi është një nga viruset më ngjitëse që prek njerëzit; për çdo person që ka fruth, deri në 18 persona të tjerë të pavaksinuar do të infektohen, duke e bërë atë rreth 12 herë më ngjitës se gripi.

Sëmundja mund të shkaktojë ndërlikime shëndetësore afatgjata dhe dobësuese, duke përfshirë dëmtimin e sistemit imunitar duke “fshirë” kujtesën e tij se si të luftohen infeksionet për muaj deri në vite.

Kjo i lë të mbijetuarit e fruthit të prekshëm ndaj sëmundjeve të tjera dhe vdekjes, paralajmëron OBSH-ja.

Vaksinimi: e vetmja rrugë përpara

Nuk ka kurë dhe as trajtim specifik për fruthin; zakonisht zgjat rreth dy javë pa ndërlikime, duke nënvizuar rolin kyç të vaksinimit në përballimin e sëmundjes.

“Ndërsa rastet janë ulur, kushtet që çuan në rishfaqjen e kësaj sëmundjeje vdekjeprurëse në vitet e fundit mbeten dhe duhet të adresohen”, tha Regina De Dominicis, drejtoreshë rajonale për Europën dhe Azinë Qendrore në Fondin e Kombeve të Bashkuara për Fëmijë (UNICEF).

Ajo theksoi nevojën për t’u marrë me hezitimin ndaj vaksinimit dhe dezinformimin. Pa këtë, shtoi De Dominics, fëmijët do të mbeten në rrezik vdekjeje ose sëmundjesh serioze nga fruthi dhe sëmundje të tjera të parandalueshme nga vaksina.

Drejtori rajonal i OBSH-së për Europën, Hans Kluge, të mërkurën bëri thirrje që njerëzit të mbështeten vetëm në informacion të verifikuar shëndetësor nga burime të besueshme në “mjedisin e sotëm të lajmeve të rreme të përhapura”.

“Eliminimi i fruthit është thelbësor për sigurinë shëndetësore kombëtare dhe rajonale”, shtoi Kluge.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.