Nga Gazeta ‘Si’- SHBA-ja ka propozuar që disa pjesë të rajonit lindor të Ukrainës, të Donbasit, të cilat kontrollohen ende nga forcat e Kievit, të krijojnë një “zonë të lirë ekonomike” sipas planit të paqes që po përpunohet, thanë zyrtarët e përfshirë në bisedime.
Rusia e quan këtë një “zonë të demilitarizuar”, u tha sot presidenti ukrainas, Volodymyr Zelensky gazetarëve në Kiev.
“Kompromisi është që pala ruse të mos avancojë në këtë zonë”, shtoi ai.
“Nëse njëra palë tërhiqet, siç u është kërkuar ukrainasve, pse pala tjetër ndërluftuese nuk tërhiqet në të njëjtën distancë në drejtimin tjetër?”, tha Zelensky.
“Gjithashtu, mbetet e paqartë se si do të administrohet – e ashtuquajtura “zonë e lirë ekonomike” – dhe si mund të pengohet avancimi i Rusisë, ndoshta me trupa me veshje civile”, tha presidenti ukrainas.
Ukraina, aktualisht kontrollon ende rreth 30% të rajoneve lindore të Ukrainës, Luhanskun dhe Donetskun, të njohura si Donbasi.
Zelensky konfirmoi gjithashtu se në këmbim, plani parashikon tërheqjen e ushtrisë ruse nga rajonet si, Sumy, Kharkivi dhe Dnipropetrovsku.
“Për rajonet jugore të Ukrainës, Zaporizhia dhe Khersoni, është planifikuar një ngrirje përgjatë vijës aktuale të frontit”, tha ai.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
