.png)
Nga Gazeta Si- 18 për qind e vajzave dhe grave në Shqipëri kanë përjetuar dhunë fizike ose seksuale gjatë jetës së tyre, sipas studimit të fundit të Organizatës Botërore të Shëndetësisë.
Sipas të dhënave të vitit 2023, vlerësimet kombëtare të prevalencës së dhunës fizike dhe/ose seksuale nga partneri gjatë jetës dhe 12 muajve të fundit përfshijnë gra dhe vajza të moshës 15-49 vjeç.
Nga 18 për qind e grave dhe vajzave që kanë përjetuar dhunë, 2.3 për qind janë dhunuar në muajin e fundit dhe 1.5 për qind janë dhunuar nga persona të tjerë, as të afërm e as partnerë.
Në Greqi, 22 për qind e vajzave dhe grave janë dhunuar të paktën 1 herë në jetë, ndërsa në Itali janë dhunuar 15 për qind e vajzave.
Pothuajse një në tre gra në mbarë botën, rreth 840 milionë, kanë përjetuar dhunë seksuale gjatë jetës së tyre.
32 gra të vrara në 3 vite
Sipas raportit të fundit të Kombeve të Bashkuara, midis viteve 2021 dhe 2023, 32 gra dhe vajza u vranë në Shqipëri, nga të cilat 24 u klasifikuan si femicide, duke përfaqësuar një shkallë femicidesh prej 0.84 për 100,000 gra gjatë kësaj periudhe kohore.
Në raport thuhet se numri i femicideve të kryera nga partnerët intimë përbënte 15 raste (63 për qind), ndërsa 5 raste të femicideve u kryen nga anëtarë të tjerë të familjes.
Për më tepër, 4 gra u vranë nga autorë të tjerë. Të dhënat e mbledhura tregojnë se në 71 për qind (17 nga 24) të rasteve, viktimat ishin të martuara dhe 83 për qind kishin fëmijë (20 nga 24).
Xhelozia, refuzimi i ndarjes, hakmarrja për raportimin në polici ose refuzimi për të pranuar marrëdhënie të reja pas ndarjes nga autori i krimit ishin motivet kryesore për vrasjet.
Shumë raste u karakterizuan nga mizori ekstreme, duke përfshirë armë zjarri, pajisje të mprehta ose forcë fizike.
Sipas raporteve zyrtare institucionale, në 90 për qind të femicideve, viktimat kishin përjetuar më parë dhunë nga autori i krimit dhe 25 për qind e kishin raportuar abuzimin në polici.
Dy grave u ishin dhënë urdhra mbrojtjeje kur ndodhi vrasja dhe katër gra u vranë disa ditë pasi autorët ishin liruar nga burgu, pas dënimeve për dhunë në familje. Së fundmi, 35 fëmijë humbën nënat e tyre për shkak të femicidit.
Globalisht, rreth 50,000 gra dhe vajza u vranë nga partnerët intimë ose anëtarë të tjerë të familjes në vitin 2024. Kjo përfaqëson 60 për qind të afërsisht 83,000 vrasjeve të qëllimshme të grave dhe vajzave të vrara në të gjithë botën. Mesatarisht, 137 gra dhe vajza humbën jetën çdo ditë në duart e një partneri ose një të afërmi të ngushtë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
