Rusia paralajmëron: Nëse SHBA rifillon testime bërthamore, do veprojmë sipas rastit

Nga Gazeta ‘Si’– Rusia ka dërguar një paralajmërim të qartë ndaj Washingtonit, duke deklaruar se do të “veprojë në përputhje me rrethanat” nëse SHBA-të rikthejnë testimet bërthamore.

Deklarata u bë të enjten nga zëdhënësi i Kremlinit, Dmitry Peskov, pas komenteve të së fundmi të zyrtarëve amerikanë mbi rishikimin e politikës së testimit.

Peskov reagoi ndaj deklaratës së Sekretarit të Shtetit të SHBA-së, Marco Rubio, i cili tha se direktiva e re e testimeve “përfshin sistemet e shpërndarjes”, pas urdhrit të presidentit Donald Trump më 29 tetor që Pentagon-i të nisë “menjëherë” përgatitjet për rifillimin e testeve bërthamore. Rubio, megjithatë, nuk konfirmoi hapur nëse po shqyrtohen teste në shkallë të plotë.

“Nëse kjo nënkupton se SHBA-të po tërhiqen nga ndalimi i testimeve, atëherë kemi konfirmimin e qëllimeve të tyre,” u shpreh Peskov, duke kujtuar se deri tani ka qenë në fuqi një moratorium i plotë. “Siç tha presidenti ynë, Rusia do të reagojë sipas situatës.”

Ai theksoi se urdhri i presidentit Vladimir Putin i datës 5 nëntor nuk synonte përgatitjen e menjëhershme të testeve, por mbledhjen e informacionit dhe vlerësimin e “këshillueshmërisë” së një hapi të tillë, në varësi të veprimeve të SHBA-së.

Ndërkohë, Sekretari i Këshillit të Sigurimit, Sergey Shoygu, tha në një intervistë për RIA Novosti se institucionet ruse kanë nisur modelimin e përgjigjeve të mundshme ndaj skenarëve të rinj që lidhen me kontrollin e armëve.

Ai paralajmëroi se Moska nuk mund të “rrijë duarkryq” përballë dobësimit të sistemeve ndërkombëtare të kontrollit të armatimit, duke kërkuar shpjegime më të qarta nga Washingtoni mbi planet e tij për testimet bërthamore.

“Rusia është e përgatitur për çdo zhvillim,” tha Shoygu, “por nuk do të lejojë nën asnjë rrethanë të provokohet një garë e re armatimesh, pavarësisht dëshirës së kundërshtarëve tanë.”

Ai akuzoi gjithashtu disa shtete evropiane për “përshkallëzim të deklaratave dhe planeve luftarake”, duke shtuar se Moska po monitoron nga afër vendimet e BE-së dhe NATO-s dhe po e përshtat strategjinë e saj ushtarake sipas nevojës.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.