.png)
Gazeta Si – Katari dyshohet se spiunoi gruan që akuzoi Karim Khan për abuzim seksual, prokurorin britanik të Gjykatës Ndërkombëtare Penale i cili vitin e kaluar lëshoi urdhër-arrestin kundër kryeministrit izraelit Benjamin Netanyahu.
Operacioni thuhet se kishte për qëllim minimin e besueshmërisë së akuzueses dhe shpëtimin e Khan nga diskreditimi, mbështetësit e të cilit besojnë se akuzat kundër tij janë rezultat i një fushate izraelite për ta nënçmuar atë.
Katari ka financuar dhe strehuar prej kohësh udhëheqjen e Hamasit, ndërsa mban një aleancë të fortë ushtarake me Shtetet e Bashkuara.
Gazeta “Guardian” sot zbuloi operacionin e dyshuar të inteligjencës, duke raportuar se një firmë konsulence strategjike me seli në Londër, “Highgate”, drejtoi mbikëqyrjen e akuzueses së Khan në emër të autoriteteve të Katarit.
“Highgate” dyshohet se punësoi një firmë hetimore britanike, “Elicius Intelligence”, për të mbledhur informacione private mbi gruan dhe familjen e saj dhe për të tentuar ta lidhë atë me Izraelin dhe shërbimet e sigurisë të shtetit hebre.
Të dhënat e mbledhura thuhet se përfshinin informacionin e pasaportës dhe fluturimit të gruas në vitet e fundit, si dhe informacion në lidhje me jetën e saj private, siç janë marrëdhëniet e saj të kaluara, gjendja e saj financiare dhe madje edhe certifikata e lindjes së djalit të saj.
Në fund të vitit të kaluar, Khan u akuzua nga avokatja 30-vjeçare, e cila punonte drejtpërdrejt me të, për abuzim seksual të përsëritur gjatë udhëtimeve të biznesit dhe në zyrat e tyre në Gjykatën Penale.
Khan u pezullua nga roli i tij si prokuror në pritje të rezultatit të një hetimi të nisur nga Kombet e Bashkuara, të cilat mbikëqyrin Gjykatën.
Avokatët e Khan, sipas “Guardian”, u takuan me konsulentët e Highgate, por mohuan të kenë qenë në dijeni të aktiviteteve të spiunazhit kundër akuzueses së prokurorit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
