.png)
Gazeta Si – Një tërmet i fuqishëm me magnitudë 7.4 ballë goditi Filipinet jugore dhe zyra lokale sizmologjike paralajmëroi se dëme dhe lëkundje të tjera ishin të mundshme. Tërmeti ndodhi rreth 20 kilometra larg qytetit të Manay, në rajonin Mindanao.
Instituti Filipinez i Vullkanologjisë dhe Sizmologjisë paralajmëroi se “pritet një cunami shkatërrues me lartësi valësh kërcënuese për jetën” në bregun lindor të arkipelagut, duke i këshilluar banorët e zonave bregdetare të evakuohen menjëherë. Paralajmërimi për cunami u hoq disa orë më vonë.
Dridhja e parë, më e fuqishmja, u pasua nga një e dytë, me një magnitudë prej 6.3 ballë dhe më pas të tjera që varionin nga 4.8 në 5.6 ballë.
Presidenti Ferdinand Marcos Jr. tha se dëmet e mundshme po vlerësoheshin dhe se ekipet dhe operacionet e shpëtimit po përgatiteshin dhe do të dislokoheshin sapo të ishte e sigurt për ta bërë këtë.
Vetëm 11 ditë më parë, një tjetër tërmet me magnitudë 6.9 ballë vrau 74 persona dhe shkatërroi ose dëmtoi afërsisht 72,000 ndërtesa në ishullin qendror të Cebusë.
Filipinet janë një nga vendet më të prirura ndaj katastrofave në botë, të goditura shpesh nga tërmetet dhe shpërthimet vullkanike për shkak të vendndodhjes së tyre në Unazën e Zjarrit të Paqësorit, një hark i vijave sizmike oqeanike.
Arkipelagu goditet gjithashtu nga afërsisht 20 tajfunë dhe stuhi çdo vit, duke e bërë reagimin ndaj katastrofave një detyrë thelbësore për qeverinë dhe grupet e ndihmës.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
