.png)
Gazeta Si – Policia e Mançesterit në Britani, tha se aksidentalisht qëlloi një nga dy burrat e vrarë gjatë sulmit në një sinagogë në qytet, ndërsa përpiqeshin të nënshtronin sulmuesin.
Të enjten, një burrë drejtoi makinën e tij drejt një grupi njerëzish pranë sinagogës Heaton Park Hebraic Congregation në veri të qytetit dhe më pas goditi me thikë të tjerët.
Sulmuesi u vra më vonë nga policia, e cila e identifikoi atë si Jihad Al-Shamie, një shtetas britanik 35-vjeçar me origjinë siriane.
Duke raportuar rezultatet e ekzaminimit të trupave të viktimave, Shefi i Policisë së Mançesterit, Stephen Watson, tha se njëri prej të dyve kishte një plagë me armë zjarri.
Megjithatë, sulmuesi nuk kishte armë zjarri dhe vetëm policia qëlloi gjatë sulmit. Watson e quajti ngjarjen një “pasojë tragjike dhe të paqëllimshme” të ndërhyrjes së oficerëve.
Watson nuk komentoi për shkakun e vdekjes apo identitetin e tij. Të vdekurit janë Adrian Daulby, 53 vjeç, dhe Melvin Cravitz, 66 vjeç.
Policia shtoi se një nga tre personat e shtruar në spital ka gjithashtu një plagë me armë zjarri, por plagët e tij nuk janë kërcënuese për jetën.
Sulmi u krye të enjten në mëngjes me rastin e festës së Yom Kippur (që në hebraisht do të thotë “Dita e Shlyerjes”), një nga më solemnet në fenë hebraike, në momentin kur ishte planifikuar të fillonte një shërbesë fetare me pjesëmarrje të madhe: shërbesa dhe ora e fillimit të saj ishin publikuar në faqen e internetit të sinagogës.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
