.png)
Nga Gazeta ‘Si’- Një figurë e lartë e Hamasit tha për mediat e huaja se grupi ka të ngjarë ta refuzojë planin e paqes të propozuar nga presidenti amerikan Donald Trump, duke deklaruar se ai i shërben interesave të Izraelit dhe injoron interesat e popullit palestinez.
Sipas zyrtarit të Hamasit, grupi nuk ka gjasa të pranojë çarmatimin dhe dorëzimin e armëve, një nga kushtet kryesore të planit të Trumpit.
Gjithashtu, Hamasi thuhet se kundërshton vendosjen e një Force Ndërkombëtare të Stabilizimit në Gaza, të cilën e sheh si një formë të re të okupimit.
Kryeministri izraelit Benjamin Netanyahu e ka pranuar planin e Trumpit gjatë bisedimeve në Shtëpinë e Bardhë të hënën. Ndërkohë, Hamasi nuk ka dhënë ende një përgjigje zyrtare.
Ministria e Jashtme e Katarit ka deklaruar se Hamasi është duke e shqyrtuar propozimin e Shtëpisë së Bardhë “në mënyrë të përgjegjshme”.
Një zyrtar i lartë palestinez me njohuri mbi bisedimet e Hamasit tha se në to janë të përfshirë udhëheqës të grupit brenda dhe jashtë Gazës.
Komandanti ushtarak i Hamasit në territor, Ez al-Din al-Haddad, mendohet se është i vendosur të vazhdojë luftën në vend që të pranojë planin. Figurat e Hamasit jashtë Gazës janë lënë kohët e fundit mënjanë nga diskutimet, pasi nuk kanë kontroll të drejtpërdrejtë mbi pengjet.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
