.png)
Gazeta Si – Të enjten, presidenti i SHBA-ve, Donald Trump tha se Komisioni Federal i Komunikimeve (FCC), duhet të revokojë licencat e transmetimit të rrjeteve, programet e të cilave flasin keq për të.
Trump po kthehej nga një vizitë shtetërore në Mbretërinë e Bashkuar dhe, duke folur me gazetarët, tha: “Lexova diku se rrjetet janë 97 përqind kundër meje (…). Ata thjesht po flasin keq për mua. Dhe kanë një licencë. Kjo më bën të mendoj se duhet t’i heqim atë”.
Në përgjithësi, për muaj të tërë administrata Trump është përpjekur të ndikojë në mediat që i konsideron jo miqësore dhe të kufizojë lirinë e shprehjes, ndonjëherë përmes mjeteve dhe vendimeve dramatike.
Shembulli më i fundit dhe më i qartë i këtij trendi ishte pezullimi i pacaktuar i emisionit të komedianit Jimmy Kimmel, pas një kërcënimi të drejtpërdrejtë nga kryetari i FCC-së Brendan Carr, një ideolog i krahut të djathtë i emëruar nga Trump.
Në një episod të emisionit të tij, “Jimmy Kimmel Live” disa ditë më parë, prezantuesi bëri një shaka duke akuzuar të djathtën se kërkonte shfrytëzim politik të vrasjes së aktivistit Charlie Kirk javën e kaluar.
Menjëherë pas kësaj, Carr tha se ABC, rrjeti që transmeton shfaqjen, dhe Ëalt Disney Company, e cila zotëron ABC, do të përballeshin me pasoja nga FCC nëse nuk do të ndërmerrnin veprime kundër Kimmel.
Brenda pak orësh, “Jimmy Kimmel Live” u pezullua. Episodi i planifikuar, në të cilin Kimmel ishte planifikuar të trajtonte çështjen, u anulua.
Për të ndikuar dhe heshtur mediat e konsideruara armiqësore, administrata po përdor dy metoda: së pari, po shfrytëzon ndikimin dhe fuqitë e FCC-së në një mënyrë të paprecedentë, e cila, sipas ligjit, u jep licenca rrjeteve private me kusht që ato të përmbushin “standardet e interesit publik”.
Ligji është interpretuar gjithmonë shumë lirshëm dhe më e rëndësishmja, nuk është përdorur kurrë si mjet për të ndërhyrë në vendimet editoriale të rrjeteve.
FCC është gjithashtu përgjegjëse për miratimin ose refuzimin e lëvizjeve të korporatave midis kompanive në sektorët e lajmeve dhe argëtimit, dhe kjo fuqi për të bllokuar kontratat u përdor në korrik për të mbyllur “Late Show” me Stephen Colbert, një tjetër “talk show” popullor që transmetohet në CBS, në pronësi të “Paramount”.
Sipas raporteve të ndryshme të medias, “Paramount” vendosi ta mbyllë programin, sepse kishte frikë se FCC do të pengonte përpjekjen e saj për të blerë kompaninë e prodhimit “Skydance”. “Paramount” tha se shfaqja u mbyll për arsye “financiare”.
Mjeti tjetër i administratës për të ndikuar në media, është përmes padive. Këtë javë, Trump paditi” Neë York Times” për shpifje, duke kërkuar 15 miliardë dollarë dëmshpërblim, duke e akuzuar gazetën se është “një zëdhënës i Partisë Demokratike” (Trump është republikan).
Në korrik, ai paditi “Wall Street Journal” për 10 miliardë dollarë dhe padi të mëparshme ishin ngritur kundër CBS (rrjetit të Colbert) dhe ABC (rrjetit të Kimmel).
Ekspertët ligjorë thonë se këto padi janë të gabuara dhe të destinuara të dështojnë në gjykatë, veçanërisht pasi Kushtetuta e SHBA-ve ofron mbrojtje të jashtëzakonshme për lirinë e shprehjes.
Por paditë nuk janë aq shumë një mënyrë për t’u angazhuar në debat ligjor sesa një paralajmërim: ata që i vuajnë ato, e dinë se që nga ajo kohë e tutje, do të gjenden përballë jo vetëm Trumpit, por të gjithë pushtetit të presidencës së SHBA-ve.
Për këtë arsye, si CBS, ashtu edhe ABC kanë vendosur të pajtohen. CBS, si pjesë e marrëveshjes, premtoi të ndryshojë mënyrën se si kryen intervista politike dhe emëroi një aleat të Trumpit për të rishikuar mbulimin politik të programeve të saj.
Ka pasur edhe raste më pak serioze, por ende të dukshme: për shembull, në shkurt, administrata i ndaloi agjencisë kryesore të lajmeve “Associated Press” qasjen në Shtëpinë e Bardhë, sepse refuzoi ta riemërtonte Gjirin e Meksikës “Gjiri i Amerikës” (siç do të donte Trump të quhej) në raportet e saj. Qasja e “AP” u rivendos më pas në prill, falë një vendimi.
Megjithatë, sipas Carr të FCC-së, veprimet e administratës kundër mediave të perceptuara si armiqësore nuk do të ndalen: shfaqja e Kimmel “nuk do të jetë e fundit që do të bjerë”, tha ai. Ky kufizim progresiv i lirisë së shprehjes, nuk ka të bëjë vetëm me median.
Në ditët e fundit, e djathta ka nisur një fushatë të madhe për të pushuar nga puna njerëz që festuan vrasjen e Charlie Kirk në mediat sociale, ose në përgjithësi shfaqën sjellje mosrespektuese ndaj aktivistit.
Për më tepër, sipas gazetave të ndryshme amerikane, administrata Trump synon të fillojë hetimin e fondacioneve politike progresive duke përdorur ligje antikorrupsion dhe të anulojë përfitimet dhe përjashtimet tatimore të dhëna OJQ-ve të perceptuara si të krahut të majtë.
Që kur mori detyrën për mandatin e tij të dytë në janar, Trump e ka shtrirë pushtetin dhe ndikimin e tij në shumë fusha të tjera, nga emigracioni te rendi publik.
Ai gjithashtu ka nisur një fushatë armiqësore kundër universiteteve, duke kërcënuar të zvogëlojë fondet nëse ato nuk i përshtatin politikat e tyre të brendshme me kërkesat e tij.
Përshtati: Gazeta “Si”
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
