.png)
Gazeta Si – Autoritetet në Utah, SHBA, kanë publikuar një video të re që tregon një person që ata besojnë se është vrasësi i aktivistit të krahut të djathtë Charlie Kirk, i cili u vra të mërkurën ndërsa fliste në një aktivitet në Universitetin Utah Valley në Orem.
Videoja, e filmuar pak momente pas vrasjes, tregon një person që hidhet nga çatia, ku dyshohet se vrasësi i Kirk qëlloi me armë dhe më pas vrapon nëpër park, ku u gjet një pushkë, të cilën hetuesit besojnë se është ajo e përdorur në vrasje.
FBI po ofron deri në 100 mijë dollarë shpërblim për informacion që çon në identifikimin dhe arrestimin e autorit.
Beau Mason, kreu i Departamentit të Sigurisë Publike të Utah-ut, iu referua të dyshuarit si një të ri (duke përdorur përemrin mashkullor “ai”).
Ai tha se hetuesit shpresojnë të marrin prova të ADN-së nga cepi i çatisë ku ai u hodh dhe të kenë gjetur një gjurmë të mundshme këpuce. Deri të enjten pasdite, FBI kishte publikuar tashmë imazhe të një të dyshuari për vrasjen e Kirk.
Gjatë një konference për shtyp, Mason tregoi gjithashtu disa imazhe të reja të të dyshuarit. Ai përmendi konkretisht disa nga tiparet e veshjes së të dyshuarit, duke përfshirë një bluzë me një shqiponjë dhe një flamur amerikan dhe një kapele bejsbolli të zezë me një trekëndësh, duke theksuar se të gjitha këto mund të ndihmonin në identifikim. Ai u kërkoi të gjithëve të raportonin çdo send të tillë që mund të dinin.
Që prej fillimit të kërkimit, policia e Utahut dhe FBI-ja (agjencia federale e zbatimit të ligjit e Shteteve të Bashkuara që heton krimet e rënda) kanë kërkuar ndihmë për identifikimin e të dyshuarit. Policia e Utahut tha se ka marrë tashmë qindra informacione.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
