.png)
Gazeta Si – Mbretëresha Camilla ishte viktimë e një sulmi seksual në tentativë kur ishte 16 ose 17 vjeçe. Valentine Low e zbulon këtë në librin e tij “Power and the Palace”, (“Pushteti dhe Pallati”), sipas të cilit, viktima ia raportoi incidentin Boris Johnson në vitin 2008.
Camilla e mbrojti veten nga një burrë që filloi ta prekte në një tren për në Stacionin e Paddington, duke hequr njërën nga këpucët e saj dhe duke e goditur me takën me majë në zonën intime.
Me të mbërritur në stacion, ajo raportoi incidentin dhe agresori u arrestua. Pallati Buckingham nuk ka lëshuar një deklaratë zyrtare për incidentin, por nuk dihen as detajet e historisë.
“Ajo veproi me përgjegjësi”, – tha Low për programin “Today” të BBC Radio 4, duke iu referuar Mbretëreshës Camilla.
“Jo vetëm që ishte e shkathët dhe e fortë, por ishte edhe një qytetare e përgjegjshme në sigurimin që burri të arrestohej”.
Ajo ishte ende në adoleshencë, por ruajti qetësinë dhe ndoqi këshillat që kishte marrë nga nëna e saj nëse do të gjendej ndonjëherë në një situatë të ngjashme.
Ajo vetë do ta diskutonte këtë shumë vite më vonë me Boris Johnson, i cili ishte kryebashkiak i Londrës në atë kohë.
Burime pranë Mbretëreshës, thonë se ajo nuk e bëri kurrë publik tentativën e sulmit për të shmangur tërheqjen e vëmendjes ndaj përvojës së saj dhe jo ndaj viktimave me të cilat punon tani.
Mbretëresha Camilla ka mbështetur vazhdimisht viktimat e sulmeve seksuale, përdhunimit dhe dhunës në familje.
Kjo nuk buron nga përvoja e saj personale, por nga emocioni që ka ndjerë duke dëgjuar histori gjatë viteve: “Ajo ka një interes shumë të thellë dhe të sinqertë për këtë çështje”, tha Low.
Gruaja e Mbretit Charles, është mbështetëse e organizatës bamirëse “SafeLives” dhe ka vizituar strehimore për gra dhe qendra mbështetëse për viktimat e përdhunimit në të gjithë Mbretërinë e Bashkuar dhe në mbarë botën.
Mbretëresha Camilla ka folur në shumë raste për guximin e atyre që kanë përjetuar dhunë në familje dhe pse ato nuk duhet të ndiejnë frikë ose të stigmatizohen kur raportojnë abuzimin e tyre në shumë nga fjalimet e saj publike.
“Përmes punës sime, kam folur me shumë gra që kanë përjetuar kontroll shtrëngues dhe dhunë në familje dhe, për fat të mirë, kanë dalë si fituese, jo viktima. Ato janë ndër njerëzit më të guximshëm që kam takuar ndonjëherë. Historitë e tyre janë zemërthyese dhe i kanë bërë edhe dëgjuesit më të ashpër të tyre të qajnë. Kjo është arsyeja pse është kaq e rëndësishme që këto të mbijetuara të mos ndiejnë më turp ose faj”, tha ajo në vitin 2020. Ajo gjithashtu dërgoi një letër në mbështetje të Gisèle Pelicot.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
