.png)
Nga Gazeta ‘Si’- Katër kandidatë që kanë siguruar më shumë vota se rivalët e tyre në listat e hapura nuk do të mund të jenë pjesë e Parlamentit të ri në shtator, për shkak të zbatimit të kuotave gjinore të përcaktuara në Kodin Zgjedhor.
Kuotat në fjalë parashikojnë përfaqësim të detyrueshëm gjinor, çka ka sjellë përjashtimin e kandidatëve burra me më shumë vota, në favor të grave kandidate me më pak mbështetje elektorale.
Në qarkun e Beratit, analisti Julian Zyla, i treti më i votuar në listën e hapur, nuk do të marrë mandatin e deputetit. Në vend të tij, mandatin do ta fitojë Hatixhe Konomi, e cila ka marrë rreth 1200 vota më pak.
Një situatë e ngjashme është regjistruar në Durrës, ku Ilir Ndraxhi ka grumbulluar 1900 vota më shumë se Etleva Budini, por kjo e fundit përfiton mandatin për të respektuar përqindjen gjinore.
Në Korçë, Arian Jaupllari mbetet jashtë Kuvendit pavarësisht se ka siguruar më shumë vota sesa Besa Spaho, ndërsa në Tiranë Xhemal Qefalia i PS-së është një tjetër kandidat që nuk do të jetë pjesë e legjislaturës së re për të njëjtën arsye.
Këto raste kanë ngjallur diskutime mbi mënyrën e zbatimit të kuotave gjinore dhe ndikimin e tyre në përfaqësimin proporcional të votës.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
