.png)
Nga Gazeta ‘SI’ – Shoqatat e biznesit në vend kanë propozuar një program ekonomik për partitë politike në vend, me perspektivën e forcimit të ekonomisë vendase.
Në njoftim, shoqatat shprehin shqetësimin për të ardhmen e tyre përballë konkurrencës botërore dhe një rritje tjetër çmimesh.
Nga mbështetja për prodhimin vendas tek lehtësirat fiskale, bizneset kërkojnë ndryshimin e një sërë politikash që do ta bënte më të shëndetshme klimën e sipërmarrjes në Shqipëri.
Bizneset propozojnë lehtësi fiskale për investimet në teknologji dhe inovacion. Ato sugjerojnë krijimin e një fondi kombëtar për bizneset Start Up, digjitalizimin e administratës publike për të lehtësuar shërbimet ndaj bizneseve dhe digjitalizimin e ekonomisë në tërësi.
Për bizneset është thelbësore lufta ndaj korrupsionit si garanci për një klimë të shëndetshme biznese. Ato kërkojnë transparencë në proceset e tenderimit dhe koncesioneve.
Në aspektin fiskal, ndërmarrjet vendase i kërkojnë politikës një sistem të ri fiskal me taksë të sheshtë 10% për të nxitur investimet dhe rritjen e pagës. Sipas tyre, ky regjim do të nxisë punësimin dhe formalizimin e ekonomisë. Norma e TVSH-së për sektorin e agro-përpunimit të bëhet 5%-7%, të rivendoset kompensimi i fermerëve për TVSH-n.
Prodhuesit kërkojnë lehtësira tatimore dhe për lëndët që ato përdorin në prodhim si ato djegëse p.sh.
Për turizmin, ndërmarrjet propozojnë aplikimin e “TIPS”, bakshisheve në faturën e shërbimeve bar-restorant, për të lehtësuar subjektet.
Në sektorin e ndërtimit, kërkohet rishikimi i taksës mbi pasuritë e paluajtshme, çmimeve të referencës, taksës së ndikimit në infrastrukturë dhe heqjen e taksës për “strehimin social”.
Programi mban emrin e Dhomës së Tregtisë Tiranë, Këshilli i Agrobiznesit Shqiptar, Shoqata e Ndërtuesve, Shoqata Shqiptare e Turizmit, Dhoma Ekonomike e Gruas etj.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
