.png)
Gazeta Si – Erica Y. Carr, ushtruesja e detyrës së Sekretares Ekzekutive të Agjencisë Amerikane për Zhvillim Ndërkombëtar (USAID), u kërkoi të martën punonjësve të pa shkarkuar ende të agjencisë – e cila kryesisht po shpërbëhet nga administrata e Donald Trump – të shkatërrojnë një sasi të madhe dokumentesh të klasifikuara dhe dosjeve të personelit.
Carr tha se do të fillonte duke përdorur makina grirëse dhe më pas do t’i hidhte dokumentet e mbetura në thasë për t’i djegur “kur grirësit nuk janë më të disponueshëm ose kanë nevojë për pushim”.
Sipas ligjit amerikan, zyrtarët e qeverisë amerikane duhet të marrin miratimin nga Administrata Kombëtare e Arkivave dhe Regjistrimeve përpara se të shkatërrojnë ndonjë dokument: është e paqartë nëse Carr e ka marrë këtë.
Shoqata Amerikane e Shërbimit të Jashtëm (AFSA), një sindikatë që përfaqëson stafin e USAID-it, tha se lajmet ishin alarmante, sepse dokumentet e shkatërruara mund të përfshijnë informacione dhe prova të rëndësishme në kontekstin e shumë padive të ngritura kundër administratës Trump për çmontimin e agjencisë.
Trump kishte nënshkruar një urdhër ekzekutiv për të “rivlerësuar të gjitha fondet” dhe të paktën për të pezulluar përkohësisht disbursimet e fondeve të USAID-it në janar, duke e motivuar vendimin me akuzat e përgjithshme për një përdorim “të pahijshëm” të fondeve publike, të përdorura për “financimin e fushatave të majta, ideologjike”.
Megjithatë, shumë ekspertë argumentojnë se ai nuk kishte të drejtë të mbyllte një agjenci ose të ngrinte fondet që ishin krijuar dhe miratuar nga Kongresi.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
