Gazeta Si – Të dielën, Mark Carney fitoi kryesisht zgjedhjet paraprake të Partisë Liberale në Kanada: sipas praktikës, ai automatikisht do të pasojë kryeministrin aktual Justin Trudeau si kreu i qeverisë kanadeze.
Carney ka pohuar se ai është kandidati më i mirë për të mbrojtur Kanadanë kundër kërcënimeve të presidentit amerikan Donald Trump, i cili ka folur në mënyrë të përsëritur për aneksimin e Kanadasë dhe ka vendosur tarifa, duke kërcënuar tregtinë dypalëshe:“Kush është gati të mbrojë Kanadanë? Ne e bëmë vendin më të madh në botë dhe tani një fqinj dëshiron të na e marrë? Në asnjë mënyrë. Nuk do të ndodhë”, – ta ai
Në fjalimin e tij të lamtumirës drejtuar partisë, Trudeau paralajmëroi se Kanadaja përballet me një “sfidë ekzistenciale” nga SHBA. Ai tha se vendi po përballet me një “moment përcaktues të kombit”.
“Demokracia nuk është e mirëqenë, liria nuk është e dhënë, madje edhe Kanadaja nuk është e mirëqenë”, u shpreh Trudeau.
Carney, i cili është 59 vjeç, ka qenë më parë guvernator i Bankës Qendrore Kanadeze dhe Britanike, si dhe një i dërguar special i OKB-së për klimën. Ai do të bëjë betimin në ditët në vijim.
Ai do të jetë edhe kandidati i partisë në zgjedhjet e ardhshme, të cilat duhet të mbahen brenda tetorit, por ka mundësi që ato të çohen në pranverë.
Rreth 400,000 njerëz të regjistruar me Liberalët kishin të drejtë të votonin në zgjedhjet paraprake dhe më shumë se 150,000 votuan, tha partia.
Zgjedhja e një lideri të ri ishte bërë e nevojshme pas dorëheqjes së Trudeau, i cili kishte qenë prej kohësh shumë jopopullor.
Trudeau dha dorëheqjen si lider i liberalëve dhe për rrjedhojë si kryeministër në janar, duke i dhënë fund një krize politike që kishte zgjatur për disa muaj.
Trudeau, në krye të një qeverie të qendrës së majtë, kishte humbur mbështetjen e forcave politike që e mbështesnin më parë dhe madje disa anëtarë të partisë së tij kishin kërkuar dorëheqjen e tij.
Kriza u përkeqësua në mes të dhjetorit, kur Chrystia Freeland, ministrja e Financave, njoftoi dorëheqjen e saj pak para prezantimit të rezultateve më të fundit ekonomike, të cilat treguan një deficit buxhetor shumë më të lartë se sa pritej: gati 62 miliardë dollarë kanadezë (rreth 41 miliardë euro).
Në muajt e fundit, liberalët, të cilët po përballeshin me një krizë konsensusi, megjithatë janë rikthyer, edhe për shkak të politikave agresive të presidentit amerikan Donald Trump, që bëri që shumë kanadezë të simpatizojnë Trudeau dhe pati një efekt negativ për konservatorët.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
