Gazeta Si – Gjermania nuk do të pranojë “të huajt të ndërhyjnë për të ndikuar në demokracinë tonë”. Kancelari Olaf Scholz nuk i ka thyer fjalët gjatë fjalimit të tij në Konferencën e Sigurisë në Mynih.
Reagimi i tij është një përgjigje ndaj deklaratave të nënpresidentit amerikan James David Vance, i cili kishte deklaruar se partitë gjermane duhet të fillojnë bashkëpunimin me Alternativën për Gjermaninë (AfD) dhe se liria e shprehjes është në rrezik në demokracitë evropiane.
“Zëvendëspresidenti Vance vizitoi kampin e përqendrimit Dachau disa ditë më parë dhe më vonë tha se memoriali tregon pse ne duhet të punojmë për të siguruar që diçka e tillë të mos ndodhë më kurrë. I jam mirënjohës Vance që e tha këtë. Ky angazhim nuk mund të pajtohet me mbështetjen për AfD-në. Prandaj ne nuk do të pranojmë që të huajt të ndërhyjnë në demokracinë tonë, në zgjedhjet tona, në formimin demokratik të opinionit publik në emër të kësaj partie”, tha Scholz.
Kancelari përsëriti gjithashtu se Gjermania nuk do të pranojë kurrë një paqe të imponuar për Kievin: “Jam shumë i lumtur që qeveria amerikane ka riafirmuar qëllimin tonë të përbashkët për ruajtjen e pavarësisë sovrane të Ukrainës”.
Scholz kishte fjalë dënuese për përshkallëzimin e kërkuar nga Moska: “Ajo që na bashkon sot këtu në Mynih si mbështetës të lirisë dhe demokracisë, është se jemi në anën e Ukrainës së sulmuar. Unë vetë kam pasur biseda të përsëritura me presidentin rus Vladimir Putin për t’i thënë atij se ne presim një paqe të drejtë për Ukrainën dhe të gjithë jemi dakord që konflikti duhet të përfundojë sa më shpejt të jetë e mundur. Kësaj i shtohet edhe përshkallëzimi në rritje me ushtarë nga Koreja e Veriut dhe mercenarë nga Jemeni. Ky përshkallëzim përfshin gjithashtu veprimet e rrezikshme të Rusisë kundër shteteve të NATO-s, si sabotimi i kabllove nënujore ose sulme të tjera në infrastrukturën tonë ose përpjekjet për të manipuluar zgjedhjet demokratike. Kushdo që dëshiron të lëvizë kufijtë me forcë, dëshiron të minojë rendin tonë të paqes”, tha Scholz.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
