.png)
Gazeta Si – Princi Harry i Britanisë ka arritur një marrëveshje jashtë gjykatës me “News Group Newspapers” (NGN), miliarderin dhe botuesin e tabloidit britanik “The Sun”, të cilin ai e akuzoi se kishte marrë informacion rreth tij duke përgjuar në mënyrë të paligjshme postat zanore të tij.
Akuzat mbulojnë periudhën midis viteve 1996 dhe 2011 dhe marrëveshja u arrit pas një negocimi të gjatë mes palëve, gjë që i jep fund një çështjeje ligjore që filloi në vitin 2019. Gjyqi duhej të fillonte të martën, por ishte shtyrë për shkak të bisedimeve në vazhdim.
Botuesi, i cili është pjesë e konglomeratit “News UK” të kontrolluar nga Rupert Murdoch, lëshoi një deklaratë duke i kërkuar falje princit “për ndërhyrjen serioze të “The Sun” në jetën e tij private… përfshirë rastet e aktivitetit të paligjshëm të kryer nga hetues privatë që punojnë për gazetën britanike”.
Deklarata thotë gjithashtu se NGN ka rënë dakord të paguajë “një shumë të konsiderueshme dëmshpërblimi”. Deri tani, gazeta gjithmonë i kishte mohuar akuzat e princit. Nuk është e qartë se sa është kompensimi.
Harry ka akuzuar tabloidet britanike për përdorimin e metodave të paligjshme për të marrë informacione konfidenciale rreth tij për vite me radhë.
Në vitin 2023, Gjykata e Lartë e Drejtësisë në Mbretërinë e Bashkuar, urdhëroi gazetat e tjera t’i paguanin atij dëmshpërblim, pasi kishin shkruar disa artikuj rreth tij duke përdorur informacione të marra në mënyrë të paligjshme, duke përfshirë edhe përgjimet e telefonit të tij.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
