Një meditues, Eli Susman donte të thellonte praktikën e tij të meditimit dhe udhëtimi i tij e çoi atë nëpër botë. Ai kaloi një muaj në Plum Village, një qendër praktike e meditimit në Francën jugore e drejtuar nga murgjit budistë të fokusuar në përmirësimin e artit të të jetuarit.
Susman priste të kalonte pjesën më të madhe të pushimit në seancat e meditimit me orë të tëra, por për habinë e tij, ai gjeti se orari ishte vetëm 30 minuta praktikë formale meditimi.
I mësuar me seanca shumë më të gjata meditimi, Susman filloi të ndryshonte mentalitetin e tij pasi foli më vonë me një nga murgjit. Në vend të tre orësh meditimi, murgu e këshilloi se mjaftonin tri frymëmarrje.
"Kjo më erdhi si bombë", tha Susman për CNN. "Po sikur tre frymëmarrje ose rreth 20 sekonda të jenë vërtet të mjaftueshme për të bërë një ndryshim në jetën e njerëzve?"
Susman, tani një student për doktoraturë në psikologji në Universitetin e Kalifornisë, Berkeley, testoi teorinë e tij në një studim të botuar në revistën Behavior Research and Therapy. Ai u përpoq të zbulonte nëse një moment i shpejtë i prekjes së vetvetes me dhembshuri, duke qetësuar veten përmes kontaktit fizik, mund të nxiste përfitime të ngjashme të shëndetit mendor si meditimi, i cili zakonisht kërkon më shumë kohë dhe angazhim.
Studimi tregoi se një seancë e vetme 20 sekondash e ‘përqafimit’ së vetes uli ndjeshëm stresin, rriti mirësinë dhe përmirësoi mirëqenien mendore. Efektet në shëndetin mendor ishin më të mëdha tek njerëzit që kryenin këtë mikropraktikë çdo ditë sesa ata që nuk e praktikonin aq shpesh.
"Në këtë shoqëri të privuar nga prekja, ne mund t'i ofrojmë vetes të njëjtën mirësi dhe dhembshuri që lirisht u japim të tjerëve," tha Susman. "Është pikërisht në dorën tonë."
Ky studim bazohet në një studim të vitit 2021 nga studiues gjermanë që tregoi se 20 sekonda prekje e vetes uli nivelet e kortizolit pasi njerëzit iu nënshtruan një detyre që shkakton stres.
Prekjet e shkurtra ditore përmirësonin mirëqenien e njerëzve
Studimi më i fundit mati se si studentët e kolegjit, shpesh të zënë me shkollën, punën dhe aktivitetet jashtëshkollore ndiheshin për veten e tyre. Pjesëmarrësit e studimit u caktuan rastësisht për të parë një video se si të përqafonin veten. Studentët bënë praktikat për 20 sekonda në ditë për një muaj dhe më pas iu kërkua të vlerësonin mirëqenien e tyre emocionale.
Studentët raportuan një ndryshim në vetë-dhembshurinë menjëherë pas seancës së parë. Pas një muaji praktikë ditore, raportuan nivele më të larta të dhembshurisë për veten, më pak stres dhe shëndet më të mirë mendor sesa studentët që nuk e praktikuan këtë ‘ushtrim’.
"Është një studim interesant. Kryerja e kësaj praktike ishte njësoj si të shkosh tek një terapist për shumë kohë," thotë Dr. Sanam Hafeez, neuropsikolog.
Si të praktikoni prekjen e vetë-dhembshurisë
Përfitimi i prekjes është se ai mund të praktikohet kudo, qoftë në shtëpi apo në një dhomë të mbushur me njerëz, tha Susman. Së pari, mbyllni sytë dhe mendoni për një gabim ose moment të fundit që ju bëri të ndiheni të padenjë ose një dështim. Kur kujtohen këto momente, vihet re një ndryshim në trup.
Së dyti, gjeni një vend për të prekur trupin tuaj që është i rehatshëm për ju. Në studim, njerëzit kishin një dorë mbi zemrën e tyre dhe një mbi barkun e tyre, por ata gjithashtu u inkurajuan të përdornin çdo formë tjetër të prekjes nëse ndiheshin më rehat për ta. Të bësh këtë mund të përfshijë përkëdheljen e qafës, përdorimin e gishtit të madh për të masazhuar një vend në pëllëmbë ose përkëdheljen e krahëve si një përqafim. Susman këshilloi të përqendrohesh në ndjesinë dhe ngrohtësinë e prekjes.
Së treti, njerëzit duhet të pyesin veten: "Si mund të jem një mik për veten time në këtë moment?" duke u fokusuar në faljen dhe pranimin e papërsosmërive të tyre. Pas 20 sekondash, njerëzit mund të hapin sytë ose ta përsërisin seancën aq shpesh sa të nevojitet.
Rezultatet e studimit treguan se sa më shumë njerëzit e bëjnë zakon prekjen e vetë-dhembshurisë, aq më të mëdha janë përfitimet e shëndetit mendor.
“Nuk ka të bëjë me të qenit më i mirë se kushdo apo të pretendosh se gjithçka është diell dhe ylber,” tha Susman. "Ka të bëjë me trajtimin e vetes me të njëjtën mirësi dhe kujdes që do t'i ofronit një miku të ngushtë."
Pra, nëse jeni duke kaluar një ditë të keqe, jepini vetes leje të jetë miku juaj më i mirë, edhe nëse është vetëm për 20 sekonda.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
