.png)
Nga Gazeta Si- Rreth 15.700 të rinj fitues në degët e përzgjedhura në universitetet publike dhe private janë regjistruar në raundin e parë të mbajtur nga data 30 gusht deri në 13 shtator.
Në këtë raund i ndarë në 7 faza me interval kohor prej 48-orësh, sekretaritë e fakulteteve kryen procesin e regjistrimit të studentëve që përzgjodhën ndër degët fituese, më të preferuarën prej tyre.
Gjatë dy javëve, ajo çka u vu re ishte ezaurimi total i kuotave në degët ku pranimet u bazuan mbi konkurse sic ishte Mjekësia, Arkitektura dhe Sportet. Ndërkohë, sipas të dhënave, interesi për drejtësinë ka rënë duke bërë që të ketë ende kuota bosh edhe pas mbylljes së 7 fazave.
Sipas të dhënave të bëra publike nga Rrjeti Akademik Shqiptar, që në 24 orët e para nga nisja e regjistrimeve në raundin e parë, kuotat e shpallura tek dega e Mjekësisë u plotësuan të gjitha, e në fazën e parë 48-orëshe dhe Arkiktektura e Sportet njoftuan se nuk kanë kuota të lira.
Në Universitetin e Mjekësisë, degët që plotësuan të gjitha kuotat e miratuara nga fakultetet janë Mjekësia e Përgjithshme dhe Stomatologjia.
Universiteti i Mjekësisë ka ezauruar 80% të kuotave të saj. Sipas kreut të RASH, edhe në Universitetin Bujqësor ecuria e regjistrimeve ka qenë pozitive, ndërsa pritet një panoramë më e mirë me raundin e dytë.
Kreu i RASH, Arjan Xhelaj tha se nga dita e nesërme (14 shtator) deri pasditen e të dielës, maturantët kanë të drejtën e çregjistrimit, për të përzgjedhur një tjetër degë studimi.
Ndërsa raundi i dytë i aplikimeve do të zhvillohet të enjten e ardhshme, më 19 shtator, dhe do të zgjasë 48 orë, deri në datën 21 shtator.
Në total janë mbi 19 mijë maturantë që aplikuan këtë vit në portalin u-albania për 10 preferencat në degët e studimit në universitetet publike e private në vend.
Sipas udhëzimit të Ministrisë së Arsimit, viti i ri akademik 2024-2025 do të fillojë më 9 tetor.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
