Konfindustria kërkon ndarjen e ministrisë së Turizmit nga ajo e Mjedisit: Po dëmtohet turizmi, investimet dhe mjedisi!

Nga Gazeta ‘SI’ – Konfederata e Industrive në vend, Konfindustria ka propozuar ndryshime në strukturën e kabinetit qeveritar, në mbrojtje të investimeve publike dhe mjedisit.

Në një kërkesë publike, Konfindustria propozon ndarjen e Ministrisë së Mjedisit nga ajo e Turizmit për t’i kushtuar më shumë vëmendje problematikave të ndara, pasi dëmi është i madh dhe se në asnjë vend të BE-së, këto dy portofole nuk janë të bashkuara.

Në rast të kundërt, thotë Konfederata, rrezikohen të goditen edhe më shumë standardet mjedisore, që prekin ashpër investimet e mëdha shtetërore dhe private të kryera tashmë në industrinë e turizmit, me pasoja të rënda për qëndrueshmërinë e sistemit ekonomik dhe financiar të vendit.

“Konfindustria, duke marrë shkak nga problematikat e mprehta të sezonit 2024, kërkon ndërtimin e një strategjie me veprime të shpejta institucionale, ekonomike dhe financiare, për të shpëtuar fuqinë konkurruese të industrisë turistike shqiptare, në sezonin e ardhshëm dhe në vazhdim. Veprimi i parë institucional i domosdoshëm është ndarja e Ministrisë së Mjedisit nga Turizmi”, thuhet në reagim.

Konfindustria propozon që ky ndryshim të bëhet që tani, për t’i paraprirë problematikave për sezonin e ardhshëm.

Gjithashtu kërkohet hartimi dhe zbatimi i një strategjie sa më të qartë, që “të mos rrezikohen standardet mjedisore dhe investimet e hedhura në sektorin e turizmit”, duke iu referuar edhe të dhënave ndërkombëtare.

“Këmbanë alarmi për të ardhmen e industrisë turistike shqiptare është klasifikimi në vend të fundit për pastërtinë e ujërave të Shqipërisë, e kryer nga agjencitë e BE, si dhe problematikat në menaxhimin e parkut të Butrintit, Liqenin e Ohrit, qyteteve të Beratit, Gjirokastrës…”, vihet në dukje.

Në fund, Konfindustria thekson se “është përplasje e qartë institucionale dhe që nuk ka asnjë shembull tjetër në shtetet e BE prania e një portofoli ministror të Turizmit dhe Mjedisit”.

“…është përplasje e qartë institucionale, që nuk ka asnjë shembull në shtetet e BE prania nën një portofol ministror e Turizmit dhe Mjedisit, sikurse është sot në kabinetin Rama 3. Konfindustria merr shkak për të kërkuar krijimin e Ministrisë së Mjedisit të ndarë nga Turizmi nga dhënia e lejeve të ndërtimit të njësive dhe objekteve hoteliere në kushtet e mungesës së impianteve të pastrimit të ujërave të përdorura, kapaciteteve të pamjaftueshme të furnizimit me ujë të pijshëm, që detyrojnë më pas të prekin zona të mbrojtura, punimeve ndërtimore infrastrukture në shkelje mjedisore, etj.”, mbyllet reagimi.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.