.png)
Gazeta Si- Aeroporti Payam, 30 km në veri të Teheranit. Aty zbarkojnë vetëm anije mallrash, pa fluturime të planifikuara.
Të enjten e kaluar, pak orë pas vrasjes së Ismail Haniyeh, disa zyrtarë amerikanë dhe të Omanit, zbarkuan nga një aeroplan privat. Grupi i vogël hyri në një hangar, ku një delegacion iranian po i priste. Një takim sekret dyorësh.
Për t’i dërguar një mesazh të qartë Iranit nga këshilltari i sigurisë i Shtëpisë së Bardhë, Jake Sullivan: 1) SHBA nuk dinte asgjë për planin për të eliminuar liderin e Hamasit dhe presidenti Joe Biden është i zemëruar; 2) ajatollahët të mos bien në grackën e një super-sulmi, i cili vetëm do të forconte kryeministrin izraelit, Netanyahu; 3) nëse Teherani nuk do të reagonte shumë ashpër, Uashingtoni mund të hiqte disa sanksione dhe të kthehej në një marrëveshje bërthamore, e cila u prish gjatë kohës së Trump; 4) një listë me 10 agjentë të Mossad-it, që organizuan sulmin ndaj Haniyeh, të ndihmuar nga një grup emigrantësh afganë.
“Dhe në çdo rast,” përfunduan amerikanët, “edhe pse nuk duam një luftë me Iranin, ju e dini pozicionin tonë: ne do të mbrojmë Izraelin”.
Diplomacia i provon të gjitha. “Pasdaran”-ët kanë kohë për të studiuar “vendin dhe mënyrën e duhur për të goditur” ndaj Izraelit.
Dhe raketat vdekjeprurëse “Iskander” që mbërritën në Teheran nga Rusia, të njëjtat të përdorura në Ukrainë, nuk premtojnë asgjë të mirë. As super-tuneli për ministrat izraelitë i hapur në Jeruzalem, “i përshtatshëm për një sulm shumëditor”.
Netanjahu thotë se është gati të rezistojë në shtatë fronte dhe goditjet që vijnë: nga 1800 km larg Iranit, nga 1400 nga Jemeni, nga 800 nga Iraku nga 600 km nga Siria.
Por skenari është shumë i ndryshëm nga ai i luftërave me shumë fronte të viteve ’48, ’67 ose ’73 dhe askush nuk e fsheh faktin që “Nahaja”, forca ajrore iraniane, në prill donte të bënte vetëm një shfaqje me ata 300 raketa dhe dronë të lëshuara me bujë (dhe të kapur me lehtësi) mbi Izrael.
Armët kanë ndryshuar sot: Houthët jemenas kanë rrëzuar një Mq-9 të sofistikuar amerikan, një dron 30 milionë dollarësh, i cili fluturon në 15 mijë metra dhe konsiderohet pothuajse i pathyeshëm.
Më mirë të mos nënvlerësohen. “Italianët duhet të largohen sa më shpejt nga Libani”, paralajmëron ministri i Jashtëm, Antonio Tajani.
1200 ushtarët italianë mbeten në një mision të OKB-së, por 3 mijë civilët janë larguar, siç kanë bërë tashmë amerikanët, anglezët, kanadezët, francezët, sauditët.
Tre anije u zhvendosën gjithashtu për evakuime të mundshme emergjente. Dhe ndërsa daullet e një lufte rajonale bien, negociatorët po luajnë “letrat” e tyre të fundit.
A mund të reflektojë Irani? “Nuk e di”, – thotë Biden para gazetarëve. Misioni sekret amerikan në aeroportin iranian, i zbuluar nga shtypi kuvajtian, është një nga lëvizjet e shumta në tabelën e shahut.
Në mbledhjen e G7-s të koordinuar nga Tajani u diskutua edhe për kanalet e tjera të ndërmjetësimit: “Asnjë vend nuk do të përfitonte nga një përshkallëzim i mëtejshëm”.
“Ne po bëjmë gjithçka që mundemi që gjërat të mos përshkallëzohen”, thotë Jon Finer, zëvendësi i Sullivan.
Në një telefonatë në Liban nga vendet e Gjirit, Hezbollahu shpjegoi se një përgjigje ndaj Izraelit “do të kalojë vijën e kuqe” dhe do të jetë e pashmangshme, “pa u shqetësuar nëse kjo do të shkaktojë një luftë”.
Për arabët, data e sulmit mund të jetë 12 gushti, festa simbolike hebreje e Tisha B’av që përkujton shkatërrimin e Tempullit.
“Largohuni nga logjika e reprezaljeve”, bëjnë thirrje së bashku presidenti francez Emmanuel Macron dhe mbreti i Jordanisë, Abdallah II. Për herë të parë në njëzet vjet, ministri i Jashtëm i Amanit, fluturoi në Teheran.
Ayman Safadi i shpjegoi presidentit të ri “reformist”, Masoud Pezeshkian se edhe ai do të forcohej nëse Irani tregon mençuri. Por jordanezët janë ata që ndihmuan Izraelin të rrëzonte dronët iranianë në prill.
Dhe në teokraci mbizotëron një linjë krejt tjetër: “Nëse sionistët sulmojnë interesat tona, – tha kreu i Pasdaran-it muaj më parë, – tani e tutje ka vetëm hakmarrje”.
Burimi: “Corriere della Sera”; Përshtati: Gazeta “Si”
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
