.png)
Nga Gazeta ‘SI’ – Autoriteti Kombëtar i Ushqimit ka njoftuar se ka tërhequr nga tregu një sasi mocarele të skaduar dhe një numër vezësh me përmbajtje salmonele.
Sipas Autoritetit, mocarela e llojit “Treccia di mozzarella pugliese” ishte me datë skadence të deklaruar gabim dhe nga 7.2 kg produkt, 6.2 janë tërhequr dhe asgjësuar. Urdhëri i RASFF është dhënë më 31 maj 2024, ndërsa për kohën e asgjësimit, AKU nuk jep të dhëna.
Për vezët ku është gjetur prezencë e Salmonelës, AKU thotë se tërhoqi nga tregu 8 nga 12 kg të importuara. Urdhri i RASFF është dhënë më 3 qershor 2024, ndërsa për kohën e asgjësimit, AKU nuk jep të dhëna.
U desh një denoncim i Partisë Demokratike, për të nxitur një reagim publik nga AKU. PD akuzon se Autoriteti ka fshehur lajmërimet e RASFF. Ndonëse AKU e quan informacion të rremë deklaratën e PD-së, sot (1 gusht 2024) është hera e parë që Autoriteti njofton për alertin e këtyre dy produkteve dhe asgjësimin e tyre.
Brenda pak muajve, AKU ka qenë në qendër të debateve publike nën akuzat e moskryerjes së detyrës për të inspektuar cilësinë ushqimore dhe marrjen e masave. Autoriteti u bë “mollë sherri” në Kuvend pas gjetjeve të KLSH-së, se AKU nuk kishte tërhequr nga tregu akulloret me përmbajtje lëndësh kancerogjene. Hetimi u cilësua si i pavërtetë nga Autoriteti dhe deputetët socialistë akuzuan KLSH-në për përhapje të panikut.
Mesa duket për hir të mospërhapjes së panikut, në faqet online të AKU-së gjen vetëm lajme për takimet e ministres së Bujqësisë dhe shumë pak për sigurinë ushqimore të qytetarëve.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
