Kush jeton ilegalisht në SHBA, por i martuar me amerikan/e nuk do përballet më me dëbim

Gazeta Si – Të martën (18 qershor), presidenti amerikan Joe Biden do të shpallë miratimin e një reforme të emigracionit që do t’u lejojë atyre që kanë jetuar ilegalisht në SHBA për më shumë se dhjetë vjet, por janë të martuar me një shtetas/e amerikan, të fillojnë një proces për të rregulluar situatën e tyre.

Sipas Shtëpisë së Bardhë, e cila publikoi një deklaratë këtë të të martë në mëngjes duke pritur njoftimin zyrtar të Bident, më shumë se 500 mijë njerëz do të përfitojnë nga ky program.

Shumica e tyre kanë lindur në Meksikë. Personat që bëjnë pjesë në kategoritë e përshkruara nga reforma, do të kenë tre vjet kohë për të aplikuar për qëndrim të përhershëm në Shtetet e Bashkuara dhe do të kenë të drejtën e një leje pune 3-vjeçare. Procesi pritet të nisë para fundit të verës.

Njoftimi u prit shumë pozitivisht, pasi lehtëson procesin e rregullimit për qindra mijëra njerëz që tashmë jetojnë përgjithmonë në Shtetet e Bashkuara prej vitesh.

Përpara kësaj reforme, një person i huaj pa dokumente, edhe nëse është i martuar prej disa kohësh me një shtetas apo shtetase amerikane, nuk mund të punonte dhe duhej të kthehej në vendin e origjinës për të aplikuar për vizë, me rrezikun e ngecjes atje për muaj të tërë dhe që aplikimi t’i refuzohej.

Këta njerëz, as që mund të përpiqeshin të aplikonin për shtetësi, edhe pse ishin të martuar me shtetas amerikanë, pasi marrja e nënshtetësisë amerikane përmes martesës, është një proces shumë i gjatë që supozon se personi i huaj tashmë banon ligjërisht në Shtetet e Bashkuara.

Biden pritet të japë më shumë detaje mbi reformën gjatë një aktiviteti që do të mbahet të martën në Shtëpinë e Bardhë për të shënuar 12-vjetorin e miratimit të Deferred Action for Childhood Arrivals, (i njohur si DACA), i krijuar nga administrata Obama në vitin 2012, i cili mbron personat nga dëbimi që kanë ardhur në Amerikë që fëmijë.

Në vitin 2017, administrata e Donald Trump shfuqizoi programin, i cili kishte rregulluar pozicionin e mbi 600,000 njerëzve që tashmë jetonin në Shtetet e Bashkuara.

Që nga viti 2021, Biden është përpjekur ta rikthejë atë, por aktualisht është e bllokuar në Gjykatën e Apelit.

Koha e kësaj reforme, e cila u përshkrua nga gazeta “Washington Post”, si “një nga veprimet presidenciale më të gjera për të mbrojtur emigrantët në më shumë se një dekadë”, u shpall nga shumë njerëz si jo rastësi.

Vendimi vjen dy javë pasi u lëshua një urdhër tjetër ekzekutiv që u lejon zyrtarëve amerikanë në kufi të kthejnë shpejt emigrantët që hyjnë ilegalisht në Shtetet e Bashkuara pa përpunuar kërkesat e tyre për azil.

Kjo duhet të ndodhë vetëm kur një limit ditor i hyrjes është tejkaluar në kufi dhe objektet përcaktohen si “të mbingarkuara”, por duke pasur parasysh situatën aktuale, masa tashmë po përdoret gjerësisht.

Procesi është kritikuar nga shumë votues të Biden dhe disa organizata të të drejtave të emigrantëve, sepse pezullon të drejtën për të kërkuar azil të kujtdo që hyn në territorin e një shteti tjetër.

Prandaj, shumë kanë hipotezuar se të dy reformat janë paraqitur në intervale të ngushta për të shmangur dëmtimin e tepërt të imazhit të Bidenit gjatë fushatës elektorale në funksion të zgjedhjeve presidenciale të nëntorit.

Biden në fakt po përpiqet të prezantojë veten si një president që arrin të frenojë emigracionin, një çështje për të cilën ai kritikohet shumë nga kandidati republikan Donald Trump dhe elektorati i tij, si një çështje që zgjeron të drejtat e njerëzve që emigrojnë në Shtetet e Bashkuara.

Edhe në deklaratën për miratimin e reformës, Biden përshkruhet fillimisht si dikush që ka për qëllim “mbrojtjen e kufijve tanë”, shprehje e dashur për elektoratin republikan, por edhe si president që “beson në zgjerimin e rrugëve ligjore dhe në mbajtjen e familjeve të bashkuara”.