Nga Gazeta 'SI' - Afati i investimeve strategjike përfundon në dhjetor të 2024-s.
Ndryshimi sapo është dekretuar nga presidenti i vendit Bajram Begaj, duke shënuar të pestën herë që ky afat shtyhet që nga 2015-a.
Në fillim të këtij viti, kur afati i këtij ligji kishte skaduar, socialistët propozuan shtyrjen deri në 2027-n, por u kundërshtua fort nga deputetët e të dyja kaheve.
Afati u shkurtua vetëm në një vit, me shpresën se deri atëherë do të jetë gati ligji i ri integral i investimeve.
Në debatet e komisionit të Ekonomisë, deputeti socialist Erion Braçe ishte i zëshëm për kundërshtinë e tij ndaj këtij ligji, duke thënë se në Shqipëri nuk ndodhin më investime strategjike dhe se nuk mbështet rikthimin e këtij ligji.
Deputetja demokrate Jorida Tabaku u shpreh në të njëjtin komision se ligji është i porositur nga një grup biznesmenësh dhe se nuk i shërben Shqipërisë. Ajo shtoi se nuk ka ende një vlerësim nga AIDA se si investimet strategjike kanë ndikuar në ekonomi, punësim etj.
Jo vetëm politikanët, por edhe ekspertët e ekonomisë kanë analizuar se ligji për investimet strategjike në Shqipëri nuk ka arritur qëllimin parësor. Në një opinion për Gazetasi.al, ekonomistja Irena Beqiraj tregon se avantazhet për ekonominë e vendit nga investimet strategjike kanë qenë minimaliste dhe kanë prodhuar më shumë dëme se sa përfitime.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.