Nga Gazeta Si- Këshilli Studentor i Universitetit të Arteve shprehet se ndjehet i përjashtuar dhe i diskriminuar nga Teatri Kombëtar i Operas. Përmes një shkrese drejtuar ministrit të Ekonomisë, Kulturës dhe Inovacionit, Blendi Gonxhja (për dijeni të Kryeministrit Edi Rama), studentët pretendojnë përjashtimin (edhe diskriminim) nga politikat institucionale të Teatrit Kombëtar të Operas dhe Ansamblit të Këngëve dhe Valleve Popullore.
Ky qëndrim, siç ata argumentojnë bie ndesh me Marrëveshjen e nënshkruar mes UA dhe TKOBAP në 2019 ku Ministria do angazhonte institucionet e saj të varësisë në fushën e artit dhe kulturës për të krijuar bashkëpunimet në nivel institucional me departamentet e ndryshme të Universitetit sipas specifikave për platforma dhe programe për studentët.
Përfshirja masive, sipas tyre, e studentëve të Konservatorit të Salernos dhe Foggias ku drejtori artistik i TKOB, Jaçopo Sipari Di Pescasseroli aderon si pedagog, do të thotë angazhim më i paktë i studentëve vendas. Po ashtu në këtë shkresë shtohen shqetësimet për:
-Ligjshmërinë e vendeve të punës, me pozicione të hapura dhe ndaj kandidaturave të huaja
-Ligjshmërinë e kontratave të punës me kohë të plotë për artistë të huaj
-Publikimi i njoftimeve për audicione në italisht nga drejtori artistik i TKOB
-Kërkesat për nivelin e studimit për secilin pozicion pune
-Zotërimin e gjuhës shqipe nga artistët e huaj që aderojnë në TKOB
Një nga shqetësimet e tyre kryesore është fakti i përfshirjes masive të studentëve të Konservatorit të Salernos dhe Foggia (Itali), “ku drejtori artistik i TKOBAP, Jacopo Sipari di Pescasseroli aderon si pedagog i klasës së dirizhimit, dhe për pasojë mosangazhimi i studentëve të universitetit tonë. Kjo sjellje e njëanshme bie ndesh si fillim me parimet kombëtare dhe më pas, me ato të barazisë dhe mundësisë për të gjithë studentët tanë”.
Sipas studentëve, duket se TKOBAP e ka më të thjeshtë “orientimin e taksapaguesve shqiptarë përkundrejt studentëve italianë sesa bashkëpunimin me Universitetin e Arteve Tiranë, i cili ndodhet jo më larg se 500 metra distancë”.
“Përpos këtij fenomeni, një sërë aspektesh janë bërë tashmë shqetësuese për ne. Publikimi i audicioneve te TKOBAP publikohet fillimisht në profilin e rrjetit social të drejtorit artisik, Jacopo Sipari, në gjuhën italiane, duke rënë ndesh me mospublikimin në të njëjtën kohë në faqen zyrtare të TKOBAP”, shkruajnë studentët e Arteve.
Kësaj shkrese i është përgjigjur nga ana tjetër Teatri i Operas, ku thekson se nga ana e tyre ka qenë angazhimi për ti dhënë jetë Paktit të bashkëpunimit të 2019-ës, duke nënvizuar faktin se deri më tani kjo marrëveshje nuk është bërë aktive, sipas tyre, jo për neglizhencë të Teatrit. Gjithashtu, në reagimin e TKOBAP flitet për neglizhencë të Universitetit të Arteve për të bashkëpunuar.
Përgjigja e plotë e TKOBAP:
Në vijim të një shkrese të dërguar pranë TKOB-së, nga studentët e Universitetit të Artit, sqarojmë se:
Objektivi ynë si institucion unik artistik, ishte dhe është, ndërtimi i një urë komunikimi, për të cilin drejtoresha e Përgjithshme e TKOB-së, Abigeila Voshtina, e ka ftuar drejtuesin e Universitetit të Artit që ti japim jetë “Paktit” të firmosur nga ish-ministrja, Elva Margariti dhe ish-drejtuesi i TKOBAP-së, Zana Çela.
Pakti i UA-së me TKOBAP-në, konsiston me rregullatorin e tij, në ngritjen e një grupi pune i cili nga viti 2019 deri më sot nuk ka qenë asnjëherë aktiv, dhe jo për arsye të TKOBAP-së.
Ndërkohë, vetëm nga buxheti i 2023-ishit ka shpenzuar 30.000 euro vetëm për studentet e UA-së qe marrin pjesë rregullisht ne shfaqjet tona, i cili konsiston në një të katërtën të buxhetit tonë.
1. Janë vënë 4 shfaqje ne skene me Flautin Magjik , ku rolet kryesore kanë qenë 90 % i studenteve te UA-së me profesoreshën Ulpiana Aliaj.
2. Janë bërë masterklase të ndryshme për të gjithë këngëtarët lirik të hapura dhe për studentët.
3 .Janë ftuar profesorë të UA-së si rrjedhojë e projekteve që kanë dërguar tek ne në sezonin artistik tonin; Kastriot Tusha, Ardita Bufaj, Xhovana Marku, Marin Gjollma, Dorina Laro.
Janë kryer takime edhe për katedrën e Dirigjimit me z. Dorian Çene dhe asnjë nga diskutimi me planin e punës konkret nuk ka ecur përpara sepse nuk kanë sjellë askënd për të ndjekur planin e provave që në TKOBAP, është në rendin e ditës.
Janë ftuar pianist instrumentiste, pas një takimi të kryer me Zv/Dekanen, znj. Merita Rexha për masterin e M* Dellisanti për “vocal coach”, lënde e cila nuk studiohet ne UA, dhe pas një dite masterclass janë larguar të gjithë për arsye paaftësie në leximin “aprima vista”.
Janë hapur konkurse të shumta në çdo sektor të cilat kanë qenë publike jo vetëm në rrjetet tona sociale, por edhe në Ëeb dhe APP, duke dashur të mirë-informojmë këdo, si shqiptare dhe të huaj për arsye se disa nga instrumentet special nuk kanë as numër personash në UA dhe jo më aftësi për t’i luajtur ato. Rasti konkret i audicionit të instrumentit Korno në të cilin për 3 herë nuk u paraqit askush.
Duke dashur të prek edhe politikën e TKOBAP-së me shtetit fqinj Italian, ju informojmë që po vet ne i kemi shtrirë dorën 52 konservatoreve italiane, për të rritur kapacitetin e shfaqjeve tona dhe për të arritur në objektivat tona Titanike nëpërmjet një buxheti që nuk shpenzohet aspak nga arka e Teatrit dhe e taksapaguesve Shqiptar, por nga fonde te mirëpërcaktuar me “Thirrje te hapura” dhe “Audicione” te vet këtyre institucioneve.
Duke dashur gjithmonë të jemi të hapur dhe me bonsence, shpresoj që kjo thirrje të jetë fillimi i një epoke të re bashkëpunimi dhe jo indice për të hedhur baltë mbi punën tonë kolosale 20-mujore.
Pikat që përfshin Marrëveshja e 2019-ës (e firmosur nga ish-ministrja Elva Margariti dhe Rektori i Universitetit të Arteve, Kastriot Çaushi) janë:
-Palët ngrenë grupet ndërinstitucionale të punës, të dedikuar për koordinimin e punës me Universitetin, për koordinimin e punëve për implementimin e dokumentit “Pakti i studentëve;
-Ministria mbështet Universitetin me pjesëmarrjen e specialistëve të Institutit të Monumenteve tё Kulturës në vlerësimin e problematikave infrastrukturore si dhe të bashkërendojë punën me institucionet e tjera shtetërore;
-Ministria angazhon institucionet e saj të varësisë në fushën e artit dhe kulturës për të krijuar bashkëpunimet në nivel institucional me departamentet e ndryshme të Universitetit sipas specifikave për platforma dhe programe për studentët;
-Palët bashkëpunojnë me Universitetin gjatë zhvillimit të konceptit dhe hartimit të projekteve të ndryshme për të cilat palët bien dakord që do ti bashkërendojnë;
-Ministria ndihmon universitetin për ngritje fondesh në nivel kombëtar dhe ndërkombëtar.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
