Gazeta Si- Një 65-vjeçar francez ka humbur jetën sot në spitalin e Traumës në Tiranë, pasi nuk mundi t’i mbijetojë plagëve të pësuara në një aksident rrugor në aksin Lezhë-Laç.
Aksidenti ku u përfshinë dy automjete, ndodhi mbrëmjen e të enjtes, ndërsa i plagosur mbeti edhe një shtetas turk.
Të plagosurit u dërguan në spitalin e Traumës në Tiranë për të marrë ndihmë më të specializuar, por francezi nuk mbijetoi.
Dyshohet se shkak për përplasjen e dy makinave ka qenë një parakalim i gabuar.
Në lidhje me ngjarjen, policia tha se është arrestuar shoferi i makinës tjetër, një 23-vjeçar nga Fushë Kuqe, i cili fillimisht u largua nga vendi i ngjarjes.
“Specialistët e Sektorit të Policisë Rrugore të DVP Lezhë arrestuan në flagrancë shtetasin: S. Ç., 23 vjeç, banues në Fushë Kuqe, për veprat penale “Shkelja e rregullave të qarkullimit rrugor” dhe “Largimi nga vendi i aksidentit. Arrestimi i këtij shtetasi u bë pasi dyshohet se më datë 14.03.2024, rreth orës 22:30, në kryqëzimin e fshatit Spiten, me automjetin tip “Mercedes-Benz” që drejtonte, ka aksidentuar automjetin me drejtues shtetasin francez A. P., 65 vjeç, dhe më pas është larguar nga vendi i aksidentit”, njoftoi policia.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.