Qeveria britanike po planifikon t’u paguajë azilkërkuesve deri në 3,000 paund secili për t’u transferuar në Ruandë, sipas një plani vullnetar për të ndihmuar në uljen e numrit të madh të refugjatëve, të cilëve u është refuzuar kërkesa për të qëndruar në vend.
Londra ka hartuar një plan për gati dy vjet për të deportuar emigrantët që mbërrijnë në Britani ilegalisht në Ruanda, përpara se kërkesat e tyre për azil të përpunohen, pavarësisht nëse janë dakord apo jo.
Ky plan është jashtëzakonisht i diskutueshëm dhe madje u dënua nga OKB-ja. Për kryeministrin britanik Rishi Sunak, ky është një “prioritet kombëtar urgjent”. Megjithatë, deri më tani asnjë avion me emigrantë nuk është nisur për në Ruandë. Ka dhjetëra mijëra azilkërkues në Britani të cilëve u është refuzuar azili, por ata nuk mund të largohen sepse qeveria nuk lejohet të dërgojë njerëzit në një vend të shkatërruar nga lufta ose në një vend me histori të diskutueshme të të drejtave të njeriut.
Pas disa pengesave në gjyqësor, një projektligj i ri po shqyrtohet aktualisht nga parlamenti, ku po përballet me kundërshtime të forta në Dhomën e Lordëve, dhoma e lartë e parlamentit britanik.
Megjithatë, një marrëveshje tjetër tani e tutje mund të lejojë që emigrantët të largohen vullnetarisht për në Ruanda, njoftoi sot ministria e brendshme.
“Ne po shqyrtojmë mundësinë për të dërguar vullnetarisht në Ruanda ata emigrantë që nuk kanë të drejtë të jenë këtu,” tha një zëdhënës i ministrisë.
Ruanda është gati të mirëpresë njerëzit që duan të rindërtojnë jetën e tyre dhe që nuk mund të qëndrojnë në Mbretërinë e Bashkuar, shtoi ai.
Zëdhënësi sqaroi se vitin e kaluar 19,000 persona janë “deportuar vullnetarisht nga Britania”, pa specifikuar se nga kanë ardhur apo se ku kanë shkuar.
Marrëveshja e re ka të bëjë me emigrantët, kërkesa e të cilëve për azil është refuzuar dhe për këtë arsye nuk mund të qëndrojnë legalisht në Britani, por as nuk mund të kthehen në vendin e tyre të origjinës.
Sunak ka thënë se dëshiron që fluturimet e para të dëbimit të nisen në muajt e ardhshëm, përpara zgjedhjeve që priten në gjysmën e dytë të këtij viti, në mënyrë që të përmbushë premtimin për të ndaluar emigrantët e paligjshëm.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
