Kërcënimi rus, ku ndodhen dhe sa janë armët bërthamore në Evropë

Gazeta Si – Kërcënimi i Putinit për Perëndimin (“Ne gjithashtu kemi armë në gjendje për të arritur në territoret tuaja”) nuk i lë Shtetet e Bashkuara dhe BE-në indiferente.

Megjithatë, NATO nuk do të ishte e papërgatitur për mundësinë e vendosjes së armëve bërthamore taktike në Bjellorusi, edhe pse arsenali është zvogëluar në mënyrë progresive gjatë dekadave. Por sa armë dhe ku janë vendosur ato.

SHBA vendosi armët e saj bërthamore në bazat e NATO-s pas përfundimit të Luftës së Dytë Botërore, duke filluar në vitet 1950.

Sipas CFR, Këshilli për Marrëdhëniet me Jashtë (një qendër studimore amerikane e specializuar në politikën e jashtme), armët bërthamore taktike të markës amerikane janë të vendosura në gjashtë baza në pesë vende anëtare të Aleancës: Belgjikë, Gjermani, Itali, Holandë dhe Turqi.

Mbretëria e Bashkuar dhe Franca, të cilat kanë forcat e tyre bërthamore, nuk kanë më armë amerikane.

Sipas ekspertëve të ndryshëm, Shtetet e Bashkuara mund të kenë rreth njëqind bomba bërthamore të vendosura në këto gjashtë vende.

Megjithatë, arsenali është zvogëluar gjatë viteve pas disa marrëveshjeve për armët bërthamore, veçanërisht falë Traktatit të Forcave Bërthamore me Rreze të Mesme (INF) në vitin 1987 midis Uashingtonit dhe Moskës.

Arsenali bërthamor i SHBA-së në Evropë përbëhet tërësisht nga bomba të gravitetit B61, të dizajnuara për t’u hedhur nga bombarduesit aleatë ose avionët luftarakë.

Në shërbim për më shumë se 50 vjet, B61, sipas faqes së internetit të “CFR”-së, është arma e fundit taktike bërthamore që ende zotërohet nga SHBA-të.

Prania e armëve bërthamore në tokën evropiane u vendos për të qetësuar anëtarët e NATO-s, gjatë viteve të Luftës së Ftohtë, në rast të një sulmi të konsideruar shumë të mundshëm nga Bashkimi Sovjetik.

Nga ana tjetër, Moska ka raketa balistike ndërkontinentale, nëndetëse dhe bombardues të rëndë. Këto armë janë të vendosura në vende të ndryshme ushtarake në territorin e saj të madh.

Megjithatë, analistët nga disa vende të BE-së kanë ngritur prej kohësh dyshime për praninë e armëve bërthamore në Kaliningrad, enklava ruse midis Polonisë dhe Lituanisë.

Zyrtarisht, Moska e ka mohuar gjithmonë këtë, megjithëse, sipas CFR, një zyrtar i qeverisë ruse në vitin 2018 konfirmoi dërgimin e raketave “Iskander” me aftësi bërthamore në Kaliningrad.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.