Gazeta Si – Kristjan Asllani duhet të luftojë fort për të qenë në fushë. Jo titullar, por për të qenë zëvendësuesi i parë i Hakan Çalhanoglu, nëse mesfushori turk mungon tek Interi. Nuk do të jetë aspak e lehtë për futbollistin shqiptar, që duhet të mposhtë dy rivalë të fortë në këtë garë.
Me ikjen e Brozoviç është Çalhanoglu ai që bën diferencën tek Interi. Por kur ai mungon, kush është lojtari më adapt për ta zëvendësuar? Asllani luajti titullar në ndeshjen e parë në grupet e Ligës së Kampionëve, por nuk bindi. Sensi është i dëmtuar, Mkhitarian mund të adaptohet në atë rol, ndërsa Klasen ende nuk ka debutuar.
Mkhitarian dhe Klasen janë rivalët e Asllanit për pozicionin e regjisorit dhe gara është e hapur. Një pozicion delikat dhe Interit gjatë sezonit mund t’i ndodhë shpesh që të mungojë Hakan Çalhanoglu, ashtu si ndaj Real Sociedad. Trajneri Inzagi duhet të vendosë. Ai nuk e lejoi Asllanin që të huazohej në skuadra të tjera, duke e kosnideruar të rëndësishëm për zikaltrit.
Një shans e pati mesfushori kuqezi dhe ai nuk dha sinjalin që priste trajneri, por vetëm një ndeshje nuk mjafton për të marrë vendime të rëndësishme. Tani ‘topi’ është në ‘fushën’ e Asllanit. Mundësinë e radhës duhet ta shfrytëzojë më mirë, nëse do të që të luajë para dy rivalëve.
Kristjan Asllani është një lojtar shumë i rëndësishëm për Kombëtaren shqiptare. Sa më shumë të luajë me Interin, aq më mirë është edhe për stafin kuqezi. Trajneri Silvinjo i ka besuar fanellën e titullarit, sepse ia di mirë potencialin, por aktivizimi i rregullt ndikon drejtpërdrejt në formën e lojtarit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
